Viðskipti erlent

Allt stefnir í verkfall hjá flugmönnum British Airways

Tryggvi Páll Tryggvason skrifar
British Airways flýgur fimm sinnum í viku til Íslands yfir vor- og sumarmánuðina.
British Airways flýgur fimm sinnum í viku til Íslands yfir vor- og sumarmánuðina. Vísir/getty
Útlit er fyrir að flugmenn í Flugmannafélagi British Airways (BALPA) muni fara í verkfall síðar í sumar eftir að áfrýjunardómstóll í Bretlandi hafnaði í dag beiðni flugfélagsins um að setja lögbann á fyrirhugaðar verkfallsaðgerðir. BBC greinir frá.

Þann 22. júlí síðastliðinn samþykkti meirihluti félagsmanna að farið yrði í verkfall eftir að þriggja daga kjarasamningaviðræður fóru út um þúfur. Flugmönnunum bauðst 11,5 prósent launahækkun yfir þriggja ára tímabili.

Félagsmenn í öðrum flugmannasamtökum sem voru í samfloti með BALPA í viðræðunum tóku tilboðinu. Forsvarsmenn BALPA höfnuðu því hins vegar með þeim rökum að félagsmenn ættu skilið hærri launahækkun sökum góðrar afkomu flugfélagsins.

Eftir að félagsmenn samþykktu að farið yrði í verkfall reyndi British Airways að fá lögbann á verkfallsaðgerðir, án árangurs og því lítið sem ekkert sem stendur í vegi fyrir því að flugmenn samtakanna fari í verkfall. Tilkynna þarf þó dagsetningar fyrirhugaðra verkfallsaðgerða með 14 daga fyrirvara og enn sem komið er hefur tilkynning um verkfall ekki borist British Airways.

Því er ekki víst hvenær verkfallsaðgerðir hefjast, verði af þeim. Búist er þó við því að það verði í ágúst sem er einn mikilvægasti mánuðurinn í rekstri British Airways, enda fjölmargir á ferð og flugi í tengslum við sumarfrí og annað.


Tengdar fréttir

Airbus vill fá að bjóða í fyrirhugaða risapöntun IAG ætlaða Boeing

Christian Scherer, sölustjóri Airbus, segir að flugvélaframleiðandinn hafi mikinn áhuga á því að fá að bjóða í stóra flugvélapöntun evrópsku flugfélagasamstæðunnar IAG, sem tilkynnti í vikunni að það hafi skrifað undir viljayfirlýsingu um kaup á 200 Boeing 737 MAX flugvélum.






Fleiri fréttir

Sjá meira


×