Ólöf Hildur til Advania Data Centers

Ólöf Hildur Pálsdóttir hefur gengið til liðs við Advania Data Centers og tekur við framkvæmdastjórn fjármálasviðs félagsins.

Í tilkynningu Advania um ráðningu Ólafar er ferill hennar reifaður. Þar segir meðal annars að Ólöf hafi undanfarið starfað sem sjálfstæður fjármálaráðgjafi og setið í stjórnum félaga, m.a. Regins hf. Þar á undan hafi Ólöf starfað í um 20 ár hjá Arion banka og forvera hans m.a. sem stjórnandi á fyrirtækjasviði. 

„Almennt hefur starfsferill hennar snúist um ákvarðanir um fjárfestingar og lánveitingar, en jafnframt greiningarvinnu og samningagerð. Ólöf hefur jafnframt reynslu af straumlínustjórnun og sat í ýmsum innri ákvörðunarnefnum innan bankans,“ eins og segir í tilkynningunni en Ólöf er menntaður viðskiptafræðingur, Cand.Oecon af fjármálasviði við Háskóla Íslands þar sem hún lauk námi árið 2000.

Advania Data Centers á og rekur tvö gagnaver; THOR DC, staðsett á höfuðborgarsvæðinu, og MJOLNIR DC sem hóf starfsemi árið 2013. Er nú svo komið að það síðarnefnda telst stærsta gagnaver landsins.

Haft er eftir Eyjólfi Magnúsi Kristinssyni, forstjóra Advania Data Centers, í tilkynningunni að mikill uppgangur hafi verið í gagnaversrekstri félagsins. Því sé „ótrúlega ánægjulegt að fá jafn reynslumikinn aðila og Ólöfu til liðs við okkur til að fást við þau spennandi verkefni sem framundan eru” segir Eyjólfur Magnús .