Formúla 1

Uppgjör: Einn magnaðasti kappakstur sögunnar

Bragi Þórðarson skrifar
Max Verstappen vann sinn annan sigur á árinu og áttunda á ferlinum um helgina.
Max Verstappen vann sinn annan sigur á árinu og áttunda á ferlinum um helgina. Getty

Ellefta umferðin í Formúlu 1 fór fram í Þýskalandi í gær. Þurrt var alla helgina á Hockenheim brautinni en á sunnudaginn opnuðust himinhvolfin.

Í fyrsta skiptið á árinu var ræst á blautri braut. Allir ökumennirnir höfðu enga reynslu af því að aka þessum bílum í rigningu og sumir höfðu aldrei ekið Formúlu 1 bíl í bleytu.

Fimmfaldi heimsmeistarinn, Lewis Hamilton, ræsti fyrstur á sínum Mercedes og hélt forustunni framan af á meðan aðrir gerðu mistök.
 

Max Verstappen fór alls fimm sinnum inn á þjónustusvæðið í dekkjaskipti í kappakstrinum. Getty

Verstappen byrjaði illa

Max Verstappen var annar á ráspól en spólaði mikið í bleytunni og datt niður í fjórða sæti strax í fyrstu beygju. Hollendingnum tókst þó að keyra sig upp um sæti en snéri Red Bull bíl sínum á 26. hring þegar flestir voru komnir á þurrdekk, þá datt Max aftur niður í fjórða sætið.

Charles Leclerc keyrði listavel framan af eftir að hafa byrjað tíundi því bilun kom upp í Ferrari bíl hans í tímatökum.

Á 29. hring gerði Leclerc hinsvegar afdrifarík mistök er hann missti stjórn á bílnum í 15. beygju. Þar er ráskafli kvartmílubrautar við hlið Formúlu brautarinnar, í rigningunni virkaði kaflinn eins og svell.
 

Heimamaðurinn Nico Hulkenberg var einn af mörgum sem datt úr leik eftir útafakstur. Getty

Ótrúleg dramantík

Öryggisbíllinn var kallaður út og þá var komið að meistaranum sjálfum, Lewis Hamilton, að gera mistök. Á sama stað og Leclerc missti hann stjórn á Mercedes bíl sínum og braut framvænginn.

Bretinn hafði vit á því að fara beint inná þjónustusvæðið í viðgerðir en liðið, sem fagnaði 125 ára afmæli um helgina, var ekki tilbúið fyrir hann. Stoppið tók því tæpa mínútu og Hamilton fór úr fyrsta sætinu niður í það fimmta.

Framendi Mercedes bílsins var þó enn tjónaður eftir útafaksturinn og gekk ekkert hjá Hamilton það sem eftir lifði keppninnar. 

Ríkjandi heimsmeistarinn kom að lokum ellefti í mark og utan stiga. Þó fékk Hamilton tvö stig þar sem hann endaði níundi eftir að báðir Alfa Romeo bílarnir fengu refsingar að keppni lokinni.

Hamilton fór utan í dekkjavegginn en náði þó að halda áfram. Getty

Bottas nýtti sér ekki mistök Hamilton

Hamfarir Hamilton þýddu að nú hafði Valtteri Bottas, liðsfélagi hans, gullið tækifæri á að minnka bilið verulega í heimsmeistaramótinu.

Bottas, eins og aðrir, missti þá stjórn á bíl sínum í erfiðu aðstæðunum og varð frá að hverfa. Þannig að þrátt fyrir hræðilega helgi jók Hamilton forskot sitt á toppi mótsins.

Eftir tæplega tveggja klukkustunda kappakstur, þar sem öryggisbíllinn var alls kallaður út fjórum sinnum, var það Max Verstappen sem kom fyrstur í mark.

Þetta var annar sigur Hollendingsins á árinu og er hann nú þriðji í heimsmeistaramótinu, aðeins 22 stigum á eftir Bottas í öðru sætinu.
 

Tveir bílar með Honda-vélar enduðu á verðlaunapalli í fyrsta skiptið síðan 1992. Getty

Óvænt úrslit

Sebastian Vettel byrjaði síðastur á sunnudaginn eftir að kælikerfið fyrir forþjöppuna í Ferrari bíl hans bilaði í tímatökunum.

Vettel nýtti sér ófarir annara og keyrði mistakalaust í rigningunni í gær. Frábær akstur hans skilaði Þjóðverjanum öðru sæti eftir að hafa byrjað tuttugasti. Juan Pablo Montoya náði þessum árangri síðast árið 2005, einmitt líka á Hockenheim brautinni.

Helgin hefur verið viðburðamikil fyrir rússneska ökumanninn Daniil Kvyat. Á laugardaginn eignaðist hann sitt fyrsta barn og fagnaði því með því að klára kappaksturinn á verðlaunapalli.

Þetta var í fyrsta skiptið síðan 2008 að ökumaður Toro Rosso liðsins endar á verðlaunapalli. Rétt eins og Red Bull ekur Toro Rosso liðið með Honda vélar. Síðast gerðist það árið 1992 að tveir bílar með Honda vélar enda á verðlaunapalli.

Keppnin á Hockenheim brautinni var ein sú allra skemmtilegasta í sögu Formúlu 1. Tilhlökkunin fyrir næstu keppni er því gríðarleg. Hún fer fram í Ungverjalandi um verslunarmannahelgina.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.