Fótbolti

Gerard Pique þarf að borga spænskum yfirvöldum 300 milljónir

Óskar Ófeigur Jónsson skrifar
Gerard Pique, Shakira og strákarnir þeirra á körfuboltaleik.
Gerard Pique, Shakira og strákarnir þeirra á körfuboltaleik. Getty/James Devaney

Varnarmaður Barcelona skuldar spænskum yfirvöldum mikinn pening eftir að hafa gerst sekur um að fara sömu leið og þeir Lionel Messi og Cristiano Ronaldo.

Tribunal Económico-Administrativo Central staðfesti dóm um að Gerard Pique skuldi spænska skattinum mikinn pening vegna sölu ímyndarréttar sínum á árunum 2008 til 2010. Gerard Pique getur enn áfrýjað málinu upp í hæstarétt á Spáni.



Pique var dæmdur til þess að borga skattinum 1,89 milljónir punda í gjaldfallnar skuldir og sektargreiðslur. Það gera tæpar 300 milljónir í íslenskum krónum.

Gerard Pique bætist þar með í hóp þekktra knattspyrnumanna og stjóra sem hafa verið teknir fyrir af spænska skattinum. Lionel Messi, Cristiano Ronaldo og Jose Mourinho fengu allir samskonar sekt.

Messi borgaði þó aðeins minna (1,8 milljónir punda) en Gerard Pique til að byrja með en Messi bætti síðan 252 þúsund evrum við sína sekt til að sleppa við fangelsisvist. Cristiano Ronaldo samþykkti aftur á móti að borga 16,9 milljónir punda til að sleppa við tveggja ára skilorðsbundið fangelsi.



Gerard Pique er ekki sá eini í fjölskyldunni sem er í vandræðum hjá skattinum. Eiginkonan hans, kólumbíska tónlistarkonan Shakira, var yfirheyrð vegna gruns um að hafa komið 13 milljónum punda undan skattinum en það eru meira en tveir milljarðar íslenskra króna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.