Golf

Tiger úr leik á Opna breska

Ástrós Ýr Eggertsdóttir skrifar
Tiger Woods
Tiger Woods vísir/getty

Tiger Woods er úr leik á Opna breska risamótinu í golfi. Hann náði sér alls ekki á strik á Royal Portrush vellinum í Norður-Írlandi.

Tiger lenti í miklum vandræðum á fyrsta hringnum í gær og var á sjö höggum yfir pari þegar hann steig út á fyrsta teig í morgun. Þar byrjaði hann vel og náði í fugl strax á fyrstu holu.

Hringur Tiger í dag var alls ekki alslæmur, hann fékk samtals fjóra fugla en þrjá skolla, þar af tvo á lokasprettinum, og lék því hringinn á einu höggum undir pari. Það var hins vegar langt frá því að vera nógu gott til að vinna upp mistök gærdagsins.




Hann lenti nokkuð títt á stöðum sem gáfu erfið fuglapútt, of erfið fyrir snilli Woods og því þurfti hann að sætta sig við parið á of mörgum holum.

Tiger endaði því á sex höggum yfir pari eftir tvo hringi. Niðurskurðarlínan er þegar þetta er skrifað við eitt högg yfir par. Þrátt fyrir að niðurskurðarlínan gæti breyst, þá er hægt að segja með þó nokkurri fullvissu að Tiger sé úr leik.

Tiger vann sinn fimmtánda risatitil þegar hann vann Mastersmótið í apríl. Síðan þá hefur hann tekið þátt í takmörkuðum fjölda móta en eitt þeirra var PGA risamótið þar sem hann fór heldur ekki í gegnum niðurskurðinn.

Þetta er í fyrsta skipti á þessari öld sem að sigurvegari Mastersmótsins fer sama ár hvorki í gegnum niðurskurðinn á PGA risamótinu né Opna breska.

Skorkort Tiger á öðrum hringnum í dag skjáskot


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.