Formúla 1

Upphitun: Vettel þarf að svara fyrir sig í Frakklandi

Sebastian Vettel leiddi Kanada kappaksturinn í 42 hringi
Sebastian Vettel leiddi Kanada kappaksturinn í 42 hringi Getty

Áttunda umferðin í Formúlu 1 fer fram á Paul Ricard brautinni í Frakklandi á sunnudaginn. Red Bull freistir þess að komast nær slagnum um fyrsta sætið með nýrri Honda vél um helgina.

Mercedes hefur verið alls ráðandi það sem af er ári. Liðið hefur unnið allar keppnir ársins, Lewis Hamilton fimm og Valtteri Bottas tvær.

Í þeim keppnum sem Hamilton vann ekki varð Bretinn annar og er hann því með yfirburða forskot í heimsmeistaramótinu, alls 29 stigum á undan liðsfélaga sínum.

Nú þegar þriðjungi tímabilsins er lokið er Ferrari orðið 123 stigum á eftir erkifjendum sínum hjá Mercedes. Góðu fréttirnar fyrir ítalska liðið eru þær að bíllinn hefur verið að batna með hverri keppninni.

Sebastian Vettel kom fyrstur í mark í síðustu keppni en fékk þó aðeins silfurverðlaun. Ástæða þess er sú að Þjóðverjinn fékk fimm sekúndna refsingu fyrir að koma hættulega inná brautina eftir útafakstur.
 

Vettel varð að sætta sig við annað sætið í Kanada Getty

Vettel of mistækur

Á síðasta ári gerði Ferrari ökuþórinn alls sex mistök sem kostuðu hann sæti í keppnum. Þetta kostaði hann að lokum titilinn í fyrra þar sem Ferrari bíllinn var oftar en ekki hraðari en bíll Mercedes.

Eftir aðeins sjö keppnir á þessu ári hefur Vettel nú þegar gert tvö mistök. Sú fyrri komu á Barein brautinni er Þjóðverjinn snérist í slag sínum við Lewis Hamilton og svo núna síðast í Kanada.

Þó það megi alltaf rökræða hvort Sebastian hefði átt að fá refsingu eða ekki í Kanada er staðreyndin sú að ef hann hefði ekki gert mistök hefði hann unnið keppnina.

Það sama má sennilega segja um mistökin í Barein. Ferrari bílarnir voru mun hraðari en Mercedes á þeirri braut og hefði Vettel sennilega staðið uppi sem sigurvegari þar, í staðin endaði hann fimmti.

Nú er Þjóðverjinn 62 stigum á eftir Hamilton en munurinn gæti hæglega verið 26 stig án mistaka Vettel. Sérstaklega eru þessi mistök dýr í slag við Lewis Hamilton sem virðist aldrei slá feilhögg.
 

Red Bull mætir til Frakklands með uppfærðar Honda vélar Getty

Red Bull ætlar í slaginn á toppnum

Honda mætir með uppfærðar vélar fyrir Red Bull liðið til Frakklands. Max Verstappen hefur reglulega endað á verðlaunapalli í ár og með nýrri vél gæti hann farið að slást um fyrsta sætið.

Brautin í Frakklandi hentar þó Mercedes bílunum best að mati Mattia Binotto, stjóra Ferrari. Þá segir stjóri Mercedes, Toto Wolff, að aflið í Ferrari vélinni muni nýtast liðinu vel á löngu beinu köflunum á Paul Ricard brautinni.

Þetta mun allt saman koma í ljós um helgina. Hægt verður að fylgjast með æfingum, tímatökum og kappakstrinum í þráðbeinni á Stöð 2 Sport. Kappaksturinn byrjar klukkan 13 á sunnudaginn.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.