Tíska og hönnun

Ný samstarfslína 66°Norður og CCTV

Steingerður Sonja Þórisdóttir skrifar
Aron og Guðmundur klæðast hér jökkum úr línunni.
Aron og Guðmundur klæðast hér jökkum úr línunni. Fréttablaðið/Aron Brink

Í dag verður ný fatalína merkjanna 66°Norður og CCTV kynnt. Hægt verður að nálgast hana í svokallaðri „pop-up“ verslun á Hverfisgötu 39 um helgina. Samstarfið hefur verið í vinnslu síðan síðasta haust og samanstendur línan af jakka í tvenns konar litum, hettupeysum, hönskum og lambhúshettum þar sem blandað er saman hugmynda- og fagurfræðilegum eiginleikum beggja merkja.

CCTV er fatamerki sem vinirnir Aron Freyr Kristjánsson og Guðmundur Magnússon stofnuðu fyrir tveimur árum, en merkið verður tveggja ára núna í júní. Þeir Aron og Guðmundur eru báðir 22 ára og voru að ljúka sínu fyrsta ári í Listaháskóla Íslands, Aron í grafískri hönnun og Guðmundur í fatahönnun.

Ari Magg tók myndirndar sem fylgja línunni.

Aron og Guðmundur kynntust í listasögu í MH og höfðu báðir haft mikinn áhuga á tísku. Eftir að hafa unnið saman að nokkrum verkefnum ákváðu þeir að slá til og stofna sitt eigið merki. Þeir fengu hjálp frá félaga sínum, Pétri Kiernan, við að koma merkinu af stað og kom fyrsta línan í júní 2017.

CCTV hefur átt góðu gengi að fagna og er merkið nú vel þekkt meðal ungra tískuunnenda um allt land. Þetta er í fjórða skipti sem þeir opna tímabundið verslun af þessu tagi en þeir hafa einnig verið með ýmis „online drop“, þar sem flíkurnar eru seldar á netinu.

„Við byrjuðum að hanna þessa nýju línu í samstarfi við 66°Norður fyrir um átta mánuðum. Þetta hófst þannig að við komum með hugmynd að jakka til þeirra. Við höfðum verið að skoða efni í Álnavörubúðinni í Hveragerði og rákumst á þetta regnkápuefni sem okkur langaði að prófa að gera eitthvað óvenjulegt við.“

Aron segir þá hafa gert prufueintak og strax séð að þetta væri eitthvað sem þeir fíluðu.

Hægt verður að nálgast línuna í svokallaðri „pop-up“ verslun á Hverfisgötu 39 um helgina.

„Jakkinn vísar í sögu og arfleifð fyrirtækisins sem er síðan sett í samhengi við nútímann og okkar nálgun á fagurfræði. Þeim í 66°Norður leist vel á þetta og í kjölfarið báðu þau okkur að koma með fleiri hugmyndir að nokkurs konar línu í kringum þetta. Úr því spratt svo samstarfið. Við fórum þá að vinna þetta nánar og með fleiri flíkur í huga. Restin af línunni er í raun bara okkar útgáfa af nokkrum staðalflíkum frá þeim hjá 66°Norður. Þetta er búið að vera gríðarlega skemmtileg vinna,“ segir Aron.

Þeir segjast báðir fylgjast vel með tískunni. Það haldist í hendur við vinnu þeirra við CCTV.

„Við fylgjumst alveg með tísku en reynum frekar að vera undir áhrifum þess sem er í gangi í kringum okkur og frá fólki sem við þekkjum. Annars fær maður auðvitað innblástur alls staðar að í listum, hvort sem það er tónlist, kvikmyndir, myndlist eða manneskjur,“ segir Guðmundur.

Aron segir þá verða orðna spennta fyrir að frumsýna nýju línuna.

„Við erum búnir að bíða spenntir eftir þessu í langan tíma og núna er loksins komið að þessu. Þetta er líka flottara en það sem við höfum verið að gera, bæði flíkurnar og framsetningin. Ari Magg sá um að skjóta línuna fyrir okkur. Hann tók myndirnar á töluvert hærra plan en það sem við höfum áður gert. Við verðum með innsetningar í búðarrýminu svo þetta verður blanda af fataverslun og listasýningu.“

Strákarnir byrjuðu að vinna línuna fyrir átta mánuðum.

En hafa þeir alltaf haft áhuga á fatahönnun?

„Já, ég hef alltaf haft áhuga á fötum og tísku að minnsta kosti, en áhuginn á fatahönnun kviknaði bara í rauninni þegar við byrjuðum með CCTV. Við vissum þannig séð ekkert þegar við vorum að byrja. En í sumar verð ég í starfsnámi hjá Arnari Má Jónssyni fatahönnuði í London,“ svarar Guðmundur.

Aron segir samstarfið við 66°Norður hafa gengið mjög vel og að þeir séu afar þakklátir fyrirtækinu að hafa vilja til að gera þetta með þeim. „Líka bara að gefa okkur þetta tækifæri,“ segir Aron að lokum.

Vörurnar eru framleiddar í verksmiðjum 66°Norður og verða fáanlegar í takmörkuðu upplagi.

Haldið verður kynningarteiti í dag að Hverfisgötu 39 þar sem hin nýja samstarfslína CCTV og 66°Norður verður kynnt með viðhöfn.

Plötusnúðarnir Krabba Mane og Prince Fendi sjá um að halda uppi stuðinu og boðið verður upp á léttar veitingar. Búðin verður opin frá klukkan 17 til 22.

Fyrsta lína CCTV kom út í júní fyrir 2 árum síðan. Fréttablaðið/Anton Brink


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.