Nýtur sín best í sviðsljósinu

Kylfingurinn Brooks Koepka komst um helgina í hóp kylfinga sem hafa varið PGA-meistaramóts­titilinn með sex öðrum kylfingum þegar hann stóðst síðbúið áhlaup Dustins Johnson og vann verðskuldaðan sigur. Er þetta fjórði risatitill Koepka á stuttum ferli sem er aðeins sex ár og af sex sigrum hans á PGA-mótaröðinni eru fjórir þeirra á risamóti. Með þessu áframhaldi verður hann fljótur að koma sér í hóp með þeim bestu. Jack Nicklaus (18) og Tiger Woods (15) eru í sérflokki þegar kemur að fjölda risatitla en aðeins nítján kylfingar hafa unnið fleiri risatitla en Koepka.

Hann vantar tvo risatitla til að fullkomna slemmuna (e. grand slam) í golfi, að vinna alla fjóra risatitlana. Hann náði sjötta sæti á Opna breska meistaramótinu fyrir tveimur árum en þykir einn af sigurstranglegustu kylfingunum fyrir mótið í sumar. Þá deildi hann öðru sæti á Masters-mótinu í vor eftir að hafa misst af sama móti í fyrra vegna meiðsla.

Undirritaður var svo heppinn að vera á staðnum þegar Koepka landaði sama titli í fyrra þegar hann stóðst pressuna sem fylgdi því að halda aftur af Tiger Woods. Allur völlurinn hélt með Tiger í von um að hann myndi, þá, vinna sitt fyrsta mót í sex ár en Koepka reyndist sterkari á lokasprettinum. Í aðdraganda mótsins um helgina minntist hann á að hann hefði lært snemma að takast á við pressu, sem ungur kylfingur hafi hann verið í ráshóp með Tiger og misst einbeitinguna við það að spila með einum besta kylfingi allra tíma. Það hafi kennt honum að halda betur einbeitingu.

Það kom að því að Brooks þurfti að standast pressu um helgina. Hann var í sérflokki framan af móti og leiddi með sjö höggum eftir tvo hringi. Forskotið var áfram sjö högg fyrir lokahringinn og þrátt fyrir slakan kafla á lokahringnum tókst Koepka að hrista slenið af sér og sigla sigrinum heim í erfiðum aðstæðum í úthverfi New York um helgina.

Birgir Leifur Hafþórsson var meðal kylfinga á þriðja mótinu sem Koepka sigraði sem atvinnukylfingur. Birgir Leifur lenti í 29. sæti á mótinu á sjö höggum undir pari en Koepka var í sérflokki og vann mótið á 24 höggum undir pari.

„Ég fylgdist með honum þegar hann vann þrjú af tíu mótum sem hann tók þátt í í Áskorendamótaröðinni eitt árið. Þá sá maður að hann var með allan pakkann eins og sagt er. Brooks er líkur Tiger í því að honum líður best þegar hann er með forskotið,“ sagði Birgir Leifur um Koepka.

„Brooks, Dustin og Rory virðast ætla að vera í sérflokki næstu árin og Brooks er búinn að setja fordæmið.“