Körfubolti

Haukarnir endurheimta Íslandsmeistara úr Vesturbænum

Óskar Ófeigur Jónsson skrifar
Emil Barja lyfti síðasta bikarnum sem Haukarnir unnu í meistaraflokki karla en þeir urðu deildarmeistarar vorið 2018.
Emil Barja lyfti síðasta bikarnum sem Haukarnir unnu í meistaraflokki karla en þeir urðu deildarmeistarar vorið 2018. Vísri/Andri Marinó

Emil Barja hefur ákveðið að yfirgefa herbúðir Íslandsmeistara KR og ganga aftur til liðs við uppeldisfélagið sitt Hauka.

Haukar segja frá þessu á heimasíðu sinni og þar kemur fram að Körfuknattleiksdeild Hauka og Emil hafi gert með sér tveggja ára samning.

Emil er Haukum vel kunnugur enda spilað allan sinn feril með Haukum fyrir utan þetta eina tímabil með KR-liðinu í vetur. KR-ingar enduðu tímabilið með Íslandsmeistaratitli og því dýrmæt reynsla sem Emil tekur með sér úr Vesturbænum.

Emil var fyrirliði Hauka þegar hann yfirgaf félagið eftir 2017-18 tímabilið.

Emil mun einnig sinna yfirþjálfarastöðu yngri flokka Hauka og stýra faglegu starfi við þjálfun yngri flokkanna. Emil er menntaður íþróttafræðingur og búinn að sinna þjálfun yngri flokka um nokkurt skeið.

„Ég er mjög ánægður að vera kominn aftur í Hauka,“ sagði Emil Barja þegar undirskriftin var klár. „Ég vil þakka KR fyrir allt og flott tímabil að baki þar. Það eru spennandi tímar framundan í Hafnarfirði sem gaman verður að vera hluti af. Nýr þjálfari og fyrsta tímabilið í Ólafssal,“ bætti hann við í viðtali í frétt á heimasíðu Hauka.

Isarel Martin, nýr þjálfari Haukanna, hafði þetta að segja um nýjasta leikmanninn sinn. „Endurkoma Emils eru frábærar fréttir fyrir Hauka. Hann er mikill keppnismaður og mun hans reynsla og leiðtogahæfileikar nýtast okkur innan vallar sem utan,“ sagði Isarel Martin í frétt á heimasíðu Hauka.

Emil Barja var með 6,6 stig, 3,9 fráköst og 3,8 stoðsendingar í deildarleikjum sínum með KR á nýloknu tímabili.

Hann skoraði síðan 12 af 15 stigum sínum í úrslitaeinvíginu á móti ÍR í oddaleiknum sem KR-liðið vann 98-70.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.