Golf

Woods kærður vegna andláts starfsmanns hans

Ástrós Ýr Eggertsdóttir skrifar
Tiger vann Masters mótið í síðasta mánuði
Tiger vann Masters mótið í síðasta mánuði vísir/getty

Undirbúningur Tiger Woods fyrir PGA meistaramótið fékk ekki að ganga eins og best var á kosið því hann var kærður í vikunni vegna andláts starfsmanns veitingastaðar í eigu Woods.

Nicholas Immesberger var barþjónn á The Woods Jupiter veitingastaðnum í Flórída, veitingastað í eigu kylfingsins. Hann lést í bílslysi í desember síðastliðnum og var áfengismagn í blóði hans þrefalt leyfilegt magn.

Fjölskylda Immesberger hefur kært Woods og kærustu hans Erica Herman, sem er framkvæmdarstjóri veitingastaðarins, fyrir að færa starfsmanni þeirra áfenga drykki og leyfa honum síðan að keyra heim.

Woods er sagður hafa sjálfur borið áfengi í Immesberger, en þó mun hann ekki hafa verið á staðnum þetta kvöld samkvæmt frétt Sky Sports. Lögfræðingar fjölskyldu Immesberger segja Woods og Herman hafa átt að gera meira til þess að hindra Immesberger frá því að setjast undir stýri.

Þá er Woods einnig sakaður um að eyðileggja sönnunargögn, myndband sem sýndi Immesberger við drykkju í þrjá tíma áður en slysið átti sér stað.

Fjölskylda Immeseberger vill fá yfir 15 þúsund dollara í sárabætur, sem og allan tilfallandi kostnað við lögsóknina.

Woods er að undirbúa sig fyrir annað risamót ársins, PGA meistaramótið, og var hann spurður út í málið á blaðamannafundi fyrir mótið í gær.

„Við erum öll mjög sorgmædd yfir því að Nick hafi fallið frá. Þetta var hræðilegt kvöld með hræðilegan endi og við finnum til með fjölskyldu hans,“ hafði Woods að segja um málið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.