Formúla 1

Þúsundasti kappaksturinn um helgina

Bragi Þórðarson skrifar
Mercedes eru með yfirburðaforskot í stigakeppni bílasmiða þrátt fyrir að Ferrari bílarnir virðast hraðari.
Mercedes eru með yfirburðaforskot í stigakeppni bílasmiða þrátt fyrir að Ferrari bílarnir virðast hraðari. Getty

Fyrsta keppnin í Formúlu 1 fór fram á Silverstone brautinni árið 1950, nú 69 árum seinna mun sú þúsundasta fara fram í Kína.

Keppnin er sú þriðja í mótinu og hefur Mercedes liðið haft algjöra yfirburði í fyrstu tveimur keppnum ársins. Valtteri Bottas sigraði fyrstu keppnina með yfirburðum og liðsfélagi hans, fimmfaldi heimsmeistarinn Lewis Hamilton, vann í Barein fyrir tveimur vikum. 

Fyrir vikið er Mercedes komið með 39 stiga forskot á Ferrari þrátt fyrir að ítalska liðið lítur út fyrir að hafa hraðari bíl.

Hinn 21 árs gamli Charles Leclerc hafði sigurinn í höndunum í Barein þar til vélarbilun í Ferrari bílnum gerði út um drauma hans þegar aðeins 12 hringir voru eftir.

Mónakóbúinn er því staðráðinn í að bæta upp fyrir svekkelsið og ná sínum fyrsta sigri í Formúlu 1 um helgina.
 

Leclerc gæti unnið sinn fyrsta sigur í þúsundasta kappakstrinum Getty

Allt getur gerst í Kína

Í fyrra var það Daniel Ricciardo sem stóð uppi sem sigurvegari. Litlar líkur eru á að sú úrslit muni endurtaka sig þar sem tímabilið hefur byrjaði hrikalega fyrir Ástralann.

Daniel fór frá Red Bull yfir til Renault fyrir tímabilið og hafa liðsskiptin augljóslega ekki skilað sér. Ricciardo hefur enn ekki lokið keppni á árinu.

Sjanghæ brautin bíður ávalt upp á frábæran kappakstur með miklum framúrökstrum. Reglubreytingarnar sem gerðar voru í vetur hafa hjálpað ökumönnum gríðarlega við framúrakstur og má því búast við algjörri flugeldasýningu í Kína.

Æfingar, tímatökur og kappaksturinn sjálfur verða allt í beinni á Stöð 2 Sport. Kappaksturinn hefst klukkan sex á sunnudagsmorgun.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.