Innlent

Mammon verði ekki sinnt á helgidögum

Ari Brynjólfsson skrifar
Bingó Vantrúar á Austurvelli á föstudaginn langa myndi heyra sögunni til yrði frumvarp dómsmálaráðherra að lögum á Alþingi.
Bingó Vantrúar á Austurvelli á föstudaginn langa myndi heyra sögunni til yrði frumvarp dómsmálaráðherra að lögum á Alþingi. Fréttablaðið/Egill

Alþýðusamband Íslands telur rök dómsmálaráðherra í frumvarpi um breytingar á lögum um helgidagafrið ekki duga. Það sé ekki nóg að vísa til frelsis einstaklingsins til að sækja afþreyingu á helgidögum til að réttlæta slíkar breytingar á samfélaginu.

Verði frumvarpið að lögum verða felld niður ákvæði sem banna tiltekna þjónustu og afþreyingu á helgidögum þjóðkirkjunnar. Einnig er lagt til að upptalning á helgidögum þjóðkirkjunnar verði færð yfir í þjóðkirkjulög. Kirkjuþing lagði blessun sína yfir frumvarpið fyrir jól. Er því möguleiki að páskarnir fram undan verði þeir síðustu þar sem Vantrú stendur fyrir bingói á Austurvelli á föstudeginum langa.

Magnús M. Norðdahl, lögfræðingur ASÍ, segir að það þurfi ekki aðeins að líta til frelsis atvinnurekenda heldur frelsis launafólks til að njóta helgihalds og samveru með fjölskyldu á helgidögum.

„Frumvarpið er sett fram í nafni einhvers frelsis, verslunarfrelsis og frelsis til að hafa búðir opnar. Allt gott og blessað. En samkvæmt okkar hefðum og venjum þá tökum við okkur góð frí þar sem við þurfum ekki að sinna Mammon. Fáum borguð laun fyrir það, erum búin að semja um það,“ segir Magnús. BSRB tekur undir með ASÍ í umsögn sinni um frumvarpið og bætir við að upptalning á helgidögum þjóni mikilvægum tilgangi þrátt fyrir að kjarasamningar hafi almennt einnig að geyma slíka upptalningu.

Frumvarp ráðherra er ekki það fyrsta sinnar tegundar. Helgi Hrafn Gunnarsson, þingmaður Pírata, lagði fram frumvörp árið 2016 og í janúar 2018 sem felldu löggjöfina alfarið á brott. Biskupsstofa bað þá Alþingi um að fella ekki niður löggjöfina þar sem inntak helgidaga sameinaði þjóðina í sið. Það er skemmst frá því að segja að frumvörpin náðu ekki fram að ganga.

Magnús segir það ekki nóg að vísa til frelsis til að breyta lögunum. „Þetta er ekki í fyrsta sinn sem frumvarp af þessu tagi er lagt fram, en þetta er í fyrsta skipti sem það er bara lagt fram í nafni frelsisins. Það eru bara hallærisleg rök. Maður hlýtur að gera þá kröfu til löggjafans, ef það á að breyta einhverju í samfélaginu, að það liggi fyrir því góð rök. En að ef einhverjum ráðherra dettur í hug að segja orðið „frelsi“, þá sé allt í lagi, það er bara ekki nóg.“


Tengdar fréttir

Ágúst Þór Árnason látinn

Ágúst Þór Árna­son, aðjunkt við Há­skól­ann á Ak­ur­eyri, lést á heim­ili sínu á miðvikudag eftir skamma baráttu við krabbamein.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.