Innlent

Segir veiðigjöldin glæpsamlega háan landsbyggðarskatt

Kristján Már Unnarsson skrifar
Guðmundur Smári Guðmundsson, framkvæmdastjóri Guðmundar Runólfssonar hf. í Grundarfirði.
Guðmundur Smári Guðmundsson, framkvæmdastjóri Guðmundar Runólfssonar hf. í Grundarfirði. Stöð 2/Egill Aðalsteinsson.

Eitt fullkomnasta fiskvinnsluhús á Íslandi hefur verið tekið í notkun í Grundarfirði og nam kostnaður nærri tveimur milljörðum króna.

Guðmundur Smári Guðmundsson, framkvæmdastjóri Guðmundar Runólfssonar hf., efast um að þeir hefðu lagt út í fjárfestinguna hefðu þeir vitað hver veiðigjöldin yrðu, og segir þau glæpsamlega há; þau séu að stúta útgerð hringinn í kringum landið. Þetta kom fram í fréttum Stöðvar 2. 

Útgerðarsaga fjölskyldufyrirtækisins Guðmundar Runólfssonar í Grundarfirði nær yfir sjötíu ár en gamla fiskvinnsluhúsið var orðið úrelt. Framtíð landvinnslu var undir.

Frá Grundarfirði. Séð yfir hafnarsvæðið. Kirkjufell í baksýn. Stöð 2/Egill Aðalsteinsson.

„Það var annaðhvort að taka ákvörðun um að fara í þetta skref eða hætta. Við erum auðvitað bara miklir landsbyggðarmenn og þorpið okkar er númer eitt, tvö og þrjú,“ segir Guðmundur Smári. 

Niðurstaðan var að byggja nýtt 2.700 fermetra vinnsluhús. Vélarnar voru ræstar í lok janúar og þessa dagana eru vinnslulínurnar að komast á fulla ferð. 

„Við segjum það alveg kinnroðalaust: Þetta er ein fullkomnasta fiskvinnsla á Íslandi og þótt víðar væri leitað,“ segir framkvæmdastjórinn.

Séð yfir nýja fiskvinnslusalinn. Þar var verið að vinna bæði þorsk og karfa á tveimur vinnslulínum. Stöð 2/Egill Aðalsteinsson.

Guðmundur Smári segir þetta jafnframt einhverja mestu iðnaðaruppbyggingu á Íslandi á síðasta ári enda sé megnið af vélbúnaði íslensk smíði og íslenskt hugvit; frá fyrirtækjum eins og Marel, 3X, Frosti og Baader Ísland. Ístak hafi svo byggt húsið og nýtt iðnaðarmenn af svæðinu. 

„Við erum að vinna núna þorsk og karfa. Það eru sem sagt tvær línur inni í húsinu og meirihlutinn af þessu er að fara ferskt,“ segir Rósa Guðmundsdóttir framleiðslustjóri. 

Með nýjustu tækni, eins og í skurðarvélum, er mannshöndin leyst af hólmi. Markmiðið er að hámarka nýtingu og verðmæti fiskaflans.

Rósa Guðmundsdóttir er framleiðslustjóri Guðmundar Runólfssonar hf. Stöð 2/Egill Aðalsteinsson.

„Við höfum ekki áform um að fækka fólki. Við ætlum að hafa svipaðan starfsmannafjölda, jafnvel bæta örlítið í. En hugmyndafræðin er að ná að afkasta tvisvar sinnum því magni sem við gerðum í gamla húsinu,“ segir Guðmundur Smári.

„En álag kannski á starfsfólk á að vera minna, líkamlegt álag. Að vera að lyfta og færa til kassa, og þess háttar. Það ætti að minnka hjá okkur,“ segir Rósa. 

Fjárfestingin nemur hátt í tveimur milljörðum króna en þegar spurt er hvort hún borgi sig kemur hik á framkvæmdastjórann. 

„Hefðum við vitað hver veiðigjöldin voru á síðasta ári þá hefðum við sennilega aldrei farið í þessa fjárfestingu. Þau voru bara, vil ég orða það; glæpsamlega há. Og eru að stúta útgerð hringinn í kringum landið."

Guðmundur Smári í viðtali við Stöð 2. Stöð 2/Egill Aðalsteinsson.

„Ég hugsa að við hefðum ekki farið í fjárfestinguna hefðum við vitað um veiðigjöldin. Að vísu er búið að laga þau örlítið núna. En þau eru samt sem áður allt of há. 

Þetta er bara alveg hræðilegur landsbyggðarskattur. Það verður bara eitthvað að gerast,“ segir framkvæmdastjóri Guðmundar Runólfssonar hf.

Fjallað verður um mannlíf í Grundarfirði í þættinum „Um land allt" á Stöð 2 á mánudagskvöld. 

Hér má sjá frétt Stöðvar 2:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.