Apple kynnti kreditkort og streymisveitu

Apple hefur tilkynnt að það hyggist gefa út kreditkort. Kortið mun bera nafnið Apple Card. Þá kynnti fyrirtækið einnig til leiks nýja streymisveitu.

Kreditkortið mun bæði verða til í hefðbundnu formi auk þess sem að rafræn útgáfa af því verður útbúin fyrir iPhone-síma fyrirtækisins. iPhone-útgáfan mun fela í sér tvö prósent endurgreiðslu við hver kaup auk þess sem að ekkert árgjald verður rukkað fyrir símaútgáfuna.

Kortið er unnið í sameiningu með bandaríska bankanum Goldman Sachs og kortafyrirtækinu Mastercard en kortið var kynnt til leiks, ásamt ýmsum öðrum vörum, á sérstökum viðburði Apple í Kaliforníu-ríki fyrr í dag.

Þá var Apple TV+ appið kynnt til leiks en með því dýfir Apple fætinum í streymisveitubransann en í appinu, sem gefið verður út í haust, má finna efni frá öðrum streymisveitum á borð við Hulu og HBO auk efnis sem Apple mun framleiða sjálft. Efni frá Netflix verður þó ekki í boði.

Apple TV+ appið verður ekki eingöngu bundið við Apple-tæki en það muna einnig koma út í útgáfum sem henta snjallsjónvörpum Samsung, LG, Sony og Vizio.

Leikstjórinn frægi Steven Spielberg er á meðal þeirra sem mun búa til efni fyrir Apple TV+ auk sjónvarpsstjarna á borð við Jennifer Aniston, Oprah Winfrey, Steve Carrell og Jason Momoa.

Þá kynnti Apple einnig nýja fréttaveitu til leiks, Apple News+ þar sem finna má fjölmörg dagblöð og tímarit á borð við Wall Street Journal, New Yorker, Vogue og National Geographic gegn áskriftargjaldi.