Lloris spilar ekki meira á árinu

Hugo Lloris mun ekki spila meira fyrir Tottenham á þessu ári vegna meiðsla. Hann þarf þó ekki að gangast undir aðgerð.

Lloris, sem ver mark Tottenham og franska landsliðsins, meiddist í 3-0 tapi Tottenham fyrir Brighton í ensku úrvalsdeildinni.

Hann fór úr olnbogalið með þeim afleiðingum að liðband í olnboganum skaddaðist, en þarf þó ekki að fara í aðgerð.

Tottenham sendi frá sér tilkynningu í dag þar sem segir að hann muni ekki geta snúið til æfinga fyrr en í lok ársins.

Tottenham er í níunda sæti ensku úrvalsdeildarinnar með 11 stig eftir 8 leiki.