ESB ætlar að skýla fyrirtækjum fyrir refsiaðgerðum gegn Kúbu

Evrópusambandið hótar því að draga Bandaríkin fyrir Alþjóðaviðskiptastofnunina (WTO) og beitt viðskiptaþvingunum til að vernda evrópsk fyrirtæki sem eiga viðskipti við Kúbu. Donald Trump Bandaríkjaforseti hefur afnumið bann við því að bandarískir borgarar stefni fyrirtækjum sem fjárfesta á Kúbu.

Evrópsk og kanadísk fyrirtæki hafa fjárfest í ferðaþjónustu og orkugeiranum á Kúbu. Þau gætu orðið fyrir barðinu á hertum aðgerðum Trump-stjórnarinnar gegn Karíbahafseyjunni. Bannið sem ríkisstjórnin afnam í síðasta mánuði varðaði rétt Bandaríkjamanna til að stefna erlendum fyrirtækjum sem nota eignir sem kommúnistastjórn Kúbu þjóðnýtti eftir byltinguna árið 1959, að sögn Reuters-fréttastofunnar.

Federica Mogherini, utanríkismálastjóri ESB, telur að aðgerðir Bandaríkjastjórnar stangist á við alþjóðalög og að sambandið muni grípa til aðgerða, mögulega leita til WTO eða gera fyrirtækjum kleift að fá mögulegt tjón vegna málaferla í Bandaríkjunum bætt fyrir evrópskum dómstólum.