Mjög mikil rigning sunnan- og vestanlands á kjördag

Það er spáð mjög mikilli rigningu sunnan-og vestanlands á morgun þegar landsmenn ganga til sveitarstjórnarkosninga. Spáin lítur betur út fyrir Norður- og Austurland en eins og spákort Veðurstofunnar lítur út núna er spáð allt að 20 stiga hita á austanlands. Þá gæti jafnvel sést til sólar í þessum landshlutum.

Elín Björk Jónasdóttir, veðurfræðingur á Veðurstofu Íslands, segir að úrkoman sem búist sé við í Reykjavík sé mjög mikil fyrir höfuðborgina.

„Þetta gætu verið alveg 50 til 60 millimetrar sem falla á morgun,“ segir Elín.

Það byrjar að rigna í kvöld og heldur svo áfram þangað til annað kvöld. Úrkomunni fylgir hvassviðri; það verður hvasst í nótt en dregur svo úr vindi á morgun.

Miðað við spána er ekki von nema spurt sé hvort úrkomumetið í Reykjavík fyrir maí sé að fara að falla, eins og Einar Sveinbjörnsson, veðurfræðingur, gerði á Facebook-síðu sinni í gær. Miðað við spána þá sagði hann að metið, sem er 126 millimetrar frá 1989, væri í hættu. Fyrra metið var 122 millimetrar og var það skráð árið 1986.

„Þetta verða spennandi lokadagar. Ný mánaðarmet á veðurstöðvum með yfir 100 ára sögu teljast alltaf til tíðinda,“ sagði Einar í færslunni á Facebook sem sjá má neðst í fréttinni.

Veðurhorfur á landinu í dag og næstu daga:

Suðvestan 5-13 m/s. Skýjað með köflum og stöku skúrir um landið vestanvert fram eftir degi en bjartviðri um landið austanvert. Gengur í suðaustan 10-18 með rigningu sunnan og vestanlands með kvöldinu. Suðlægari og talsverð eða mikil rigning í nótt og fyrramálið. Dregur úr rigningu um norðan og austanvert landið fyrir hádegi en sunnan og vestantil annað kvöld. Hiti yfirleitt 6 til 13 stig en 13 til 19 stig norðaustantil á morgun.

Á sunnudag:

Sunnan og suðaustan 5-13 m/s, hvassast með suðvesturströndinni. Skýjað og rigning sunnan- og vestanlands, jafnvel talsverð um tíma en úrkomulítið austanlands. Hiti breytist lítið. Hiti 10-18 stig austantil en 5 til 13 stig um landið vestanvert.

Á mánudag:

Fremur hæg suðlæg átt. Minnkandi rigning á vestanverðu landinu og úrkomulítið þar eftir hádegi en stöku skúrir austantil. Hiti víða 11 til 17 stig.

Á þriðjudag:

Suðaustan 5-13 m/s. Stöku skúrir með suðausturströndinni og dálítil væta vestast annars víða skýjað með köflum en bjartviðri á Norðurlandi. Hlýtt í veðri.