Sara Björk skoraði tvö í stórsigri Wolfsburg

Landsliðskonan Sara Björk var tvisvar á skotskónum í stórsigri Wolfsburg á Hannover í annarri umferð þýska bikarsins í dag.



Sara Björk og stöllur hennar í Wolfsburg eru ríkjandi bikarmeistarar og hófu titilvörnina í dag með látum.



Liðið mætti Hannover en þurfti að komast í gegnum sérstaka bikarkeppni fyrir lið utan deildakeppninnar til þess að komast í þýska bikarinn, sem það gerði.



En Hannover var ekki mikil fyrirstaða fyrir stórlið Wolfsburg en Wolfsburg valtaði yfir Hannover, 11-0.



Sara Björk kom Wolfsburg á bragðið með marki strax á 5. mínútu leiksins. Hún skoraði svo einnig á 41. mínútu en það var sjötta mark Wolfsburg í leiknum.



Wolfsburg er því komið örugglega í næstu umferð bikarkeppninnar.