FIFA staðfesti að HM verður í nóvember og desember árið 2022

FIFA hefur staðfest að næsta heimsmeistarakeppni, sem fer fram í Katar árið 2022, verði leikin í nóvember og desember. Úrslitaleikurinn sjálfur verður fjórða sunnudag í aðventu.

Áður hafði komið fram að HM eftir fjögur ár yrði yfir vetrartímann þar sem hitinn í Katar er gríðarlegur á sumrin og getur farið yfir 40 gráður. Leikdagar mótsins voru staðfestir í dag.

Forseti FIFA, Gianni Infantino, staðfesti á blaðamannafundi í dag að HM 2022 færi fram dagana 21. nóvember til 18. desember. Úrslitaleikurinn sjálfur fer fram sex dögum fyrir aðfangadag jóla, fjórða sunnudag í aðventu.

„Deildum heimsins hefur verið tilkynnt um þetta nú þegar og munu að sjálfsögðu þurfa að hliðra til vegna þessa,“ hafði blaðamaðurinn Joe Crann eftir Infantino á Twitter í dag.

Allar stærstu deildir heims eru vetrardeildir og munu þurfa að taka ansi langt hlé vegna mótsins.

Mótið í Katar mun að öllum líkindum verða það síðasta þar sem þáttökuþjóðirnar eru 32, en þeim verður fjölgað í 48 á HM 2026 í Norður-Ameríku. Infantino tók þó fram á blaðamannafundinum að þrátt fyrir að gert sé ráð fyrir 32 þjóðum þá „hafi lokaákvörðunin ekki verið tekin enn.“