„Mögulega að deyja eftir að hafa prófað eiturlyf einu sinni tvisvar“

Fjallað var um kvikmyndina Lof mér að falla í Íslandi í dag á Stöð 2 í gærkvöldi en myndin segir frá hinni 15 ára gömlu Magneu en líf hennar umturnast þegar hún kynnist hinni átján ára gömlu Stellu.

Magnea laðast að hispurslausu lífi Stellu og þróar Magnea sterkar tilfinningar til hennar sem Stella notfærir sér til eigin hagsbóta. Stella leiðir Magneu inn í heim fíkniefna sem hefur alvarlegar afleiðingar fyrir þær báðar. 12 árum síðar liggja leiðir þeirra óvænt saman og verður uppgjör á milli þeirra óumflýjanlegt.

Leikstjóri myndarinnar er Baldvin Z en hann skrifar einnig handriti myndarinnar ásamt Birgi Erni Steinarssyni. Þeir eiga að baki afar giftusamlegt samstarf þegar þeir skrifuðu saman handrit myndarinnar Vonarstrætis, sem Baldvin Z leikstýrði, sem sópaði til sín tólf verðlaunum á Edduverðlaunahátíðinni árið 2015 en tæplega 48 þúsund manns sáu þá mynd í kvikmyndahúsum hér á landi.

Eðlileg stelpa í tíunda bekk

Með aðalhlutverk í Lof mér að falla eru leikkonurnar Elín Sif Halldórsdóttir og Eyrún Björk Jakobsdóttir en leikarinn Þorsteinn Bachman fer einnig með stórt hlutverk. Í myndinni fara einnig með hlutverk Sturla Atlason, Edda Björgvinsdóttir, Ólafur Darri Ólafsson og Halldór Halldórsson.

„Magnea er nokkuð eðlileg stelpa í tíunda bekk þegar myndin byrjar og hún vona að leita að sjálfum sér eins og flestir aðrir sem eru á þessum aldri,“ segir Elín Sif Halldórsdóttir, sem fer með hlutverk Magneu.

„Hún kynnist Stellu sem er spennandi og aðeins eldri en hún. Stella lifi aðeins öðruvísi en skuggalegum heimi. Hún verður algjörlega heilluð af Stellu og þessum heimi.“

„Við fengum dagbók frá stelpu sem tók sitt eigið líf í kringum aldamótin og það var svolítið kveikjan af þessu öllu,“ segir Baldvin Z, leikstjóri myndarinnar. Baldvin lítur svo á að hann sé að klára verkefnið sem hún byrjaði ár.

Staðan verri

Baldvin sagði í viðtali á Vísi að vandamálið í kringum fíkniefni sé mun verra í dag en hér áður fyrir.

„Það er mun sýnilegra og umræðan hefur aldrei verið hærri en akkúrat núna út af því að ástandið hefur aldrei verið verra.“

Myndin sýnir, samkvæmt þeim sem þekkja vel til þessa heims, hvernig hann lítur virkilega út.

„Við erum farin að sjá krakka vera taka inn stórhættuleg lyf áður en þau drekka og þau eru mögulega að deyja eftir að hafa prófað eiturlyf einu sinni tvisvar sem er náttúrulega bara skelfilegt. Fíknin spyr ekkert um aldur, gáfur eða hvaðan þú kemur. Þetta getur komið fyrir alla og við þurfum að standa okkur betur í forvörnum og fræða unga krakka.“

„Við fengum ár í undirbúning til að kynna okkur allskonar efni,“ segir Eyrún Björk Jakobsdóttir, sem fer með hlutverk Stellu í Lof mér að falla.

„Við fengum að hitta allskonar fólk og tala við fólk sem hefur reynslu úr þessum heim.“

Hér að neðan má sjá innslagið frá því í gærkvöldi í heild sinni.