Milan náði bara stigi gegn Cagliari

AC Milan mistókst að vinna annan leik sinn í ítölsku úrvalsdeildinni er liðið gerði 1-1 jafntefli við Cagliari á útivelli í kvöld.

Milan hefur einungis unnið einn leik af fyrstu þremur leikjunum og situr í fimmtánda sætinu með fjögur stig; einn sigur, eitt jafntefli og eitt tap.

Joao Pedro kom Cagliari yfir strax á fjórðu mínútu leiksins og heimamenn voru yfir í hálfleik.

Mark Milan kom hins vegar ekki úr óvæntri átt. Það skoraði markavélin Gonzalo Higuain eftir aukaspyrnu Milan og lokatölur 1-1 jafntefli.

Milan er í riðlakeppni Evrópudeildarinnar og á fimmtudaginn ferðast liðið til Lúxemborgar. Þar mætir liðið spútnikliði F91 Dudelange.