Ian Rush skoraði tvö þegar Liverpool komst síðast á toppinn eftir 1. umferð

Liverpool er á toppnum í ensku úrvalsdeildinni í fótbolta eftir 4-0 sigur á West Ham í gær. Liverpool vann stærsta sigur helgarinnar.

Það þarf að fara allt til haustsins 1994 til að finna hvenær Liverpool var síðast í efsta sæti ensku úrvalsdeildarinnar eftir fyrstu umferð.

Liverpool sat þá í efsta sætinu eftir 6-1 sigur á Crystal Palace í fyrstu umferðinni en leikurinn fór fram á Selhurst Park í London.

#OJOALDATO - El Liverpool es líder de la Premier League por primera vez desde el 6 de noviembre de 2016. No lo era en la primera jornada del campeonato desde 1994, tras un 1-6 ante el Crystal Palace en el que anotaron Mølby, McManaman (2), Fowler y Rush (2). pic.twitter.com/umiwf9WKbt

— MisterChip (Alexis) (@2010MisterChip) August 12, 2018

Danski miðjumaðurinn Jan Mölby skoraði fyrsta markið úr vítaspyrnu á 12. mínútu og tveimur mínútum síðar var Steve McManaman búinn að kom Liverpool í 2-0.

Robbie Fowler skoraði þriðja markið á lokamínútu fyrri hálfleiks.

Steve McManaman bætti við sínu öðru marki í seinni hálfleik inn á milli marka frá fyrirliðanum Ian Rush.

Liverpool vann þrjá fyrstu leiki sína þetta tímabil (3-0 á móti Arsenal og 2-0 á móti Southampton) en gaf svo eftir. Fyrsta tapið kom á móti Manchester United 17. september og fimm leiki í röð án sigurs í nóvember og desember enduðu svo gott sem allar titilvonir liðsins.

Liverpool-liðið endaði í fjórða sæti ensku úrvalsdeildarinnar á eftir Blackburn Rovers (enskur meistari), Manchester United og Nottingham Forest

Liverpool vann hinsvegar titil þetta tímabil því liðið vann 2-1 sigur á Bolton Wanderers á gamla Wembley í úrslitaleik enska deildabikarsins. Steve McManaman skoraði bæði mörkin í leiknum.