Mourinho segir United þurfa meiri tíma

Manchester United tekur á móti Tottenham í stórleik umferðarinnar í ensku úrvalsdeildinni í kvöld. Jose Mourinho, knattspyrnustjóri United, segir sitt lið þurfa meiri tíma til þess að verða betra.

United hefur fengið mikla gagnrýni það sem af er tímabili. Liðið vann ósannfærandi sigur á Leicester í fyrstu umferðinni og tapaði fyrir Brighton um síðustu helgi. Mikið hefur verið rætt um ósætti innan klúbbsins, bæði á milli Mourinho og Paul Pogba og einnig á milli stjórans og framkvæmdarstjórans Ed Woodward.

Mourinho hefur neitað öllum sögusögnum um vandræði innan klúbbsins í fjölmiðlum. Hann segir liðið þurfa tíma til þess að ná betri árangri því margir af lykilmönnum liðsins eru enn að glíma við meiðsli eða nýkomnir úr sumarfríi eftir heimsmeistaramótið.

„Þegar þú átt góða æfingaviku og hlutirnir ganga vel þá býst þú við góðum frammistöðum. Þú átt ekki von á mistökum eða slæmum úrslitum,“ sagði Mourinho í viðtali við Sky Sports.

„Venjulega þegar þú tapar þá vilt þú fara strax í næsta leik en tveimur dögum seinna þá var það ekki þannig. Ég er glaður að það hafi ekki verið þannig því á þessu augnabliki þurftum við smá tíma.“

Nemanja Matic er búinn að vera meiddur líkt og Antonio Valencia og nýi maðurinn Diogo Dalot. Þeir eru allir byrjaðir að æfa með liðinu á ný en ekki er víst þeir verði tilbúnir í kvöld.

„Þetta er stór leikur á móti góðum andstæðingi. Allir þrír leikir okkar við þá á síðasta tímabili voru erfiðir þrátt fyrir að við höfum unnið tvo þeirra.“

„Við vitum hversu góðir þeir eru og þeir munu koma hingað með sín markmið. Stórleikur en enginn sérstök ástæða til þess að bæta einhverju í hvatningarræðuna, það er hvatning að fá að spila á móti góðu liðunum,“ sagði Mourinho.

Leikur Manchester United og Tottenham verður í beinni útsendingu á Stöð 2 Sport og hefst hún klukkan 18:50.