Endar skærasta stjarna Rússa hjá Chelsea?

Enska úrvalsdeildarliðið Chelsea er talið leiða kapphlaupið um hinn 22 ára gamla Aleksandr Golovin.

Þessi rússneski miðjumaður þykir einn af efnilegri leikmönnum Evrópu og hefur verið orðaður við stórlið á borð við Barcelona og Juventus en hann er á mála hjá CSKA Moskva í heimalandinu.

Frammistaða Golovin á HM hefur bara ýtt enn frekar undir orðspor hans en hann hefur verið einn besti leikmaður heimamanna á mótinu.

Juventus gerði 20 milljón evra tilboð í Golovin á dögunum en CSKA vill að lágmarki 30 milljónir evra og er Roman Abramovich, eigandi Chelsea, tilbúinn að eyða þeirri fjárhæð til að fá landa sinn á Stamford Bridge.

Enn ríkir óvissa um hver mun stýra Chelsea á næstu leiktíð en flest bendir til þess að Maurizio Sarri muni færa sig frá Napoli til Chelsea.