Átta mánaða skilorðsbundið fangelsi fyrir barnsrán

Héraðsdómur Reykjavíkur hefur dæmt konu í átta mánaða skilorðsbundið fangelsi fyrir að brjóta gegn 193. grein almennra hegnignarlaga sem fjallar um barnsrán. Konan játaði brot sitt skýlaust fyrir dómi en til refsiþyngingar var litið til alvarleika brotsins þar sem konan „braut gróflega gegn lögvörðum rétti stúlkunnar og föður hennar á um tíu mánaða tímabili.“

Konan, sem úrskurðuð var í farbann í byrjun desember vegna málsins, var ákærð fyrir það að hafa frá því þann 13. mars 2017 til 30. janúar síðastliðins svipt föður barnsins valdi og umsjá yfir dóttur þeirra er hún fór með barnið til heimalands síns, Brasilíu, án leyfis föðurins. Þau fóru sameiginlega með forsjána til 28. nóvember síðastliðins þegar föðurnum var falin forsjáin til bráðabirgða með dómsúrskurði.

Konan byggði á því að rót þeirra atvika sem leiddi til þess að hún fór með dótturina úr landi hafi verið það að faðir stúlkunnar hafi ekki staðið við samning sem þau hafi gert um að færa lögheimili stúlkunnar til sín, móðurinnar.

„Ákærða hafi upplifað það sem svik og telur að líta beri til þessa henni til málsbóta og einnig til þess að hún hafi sagt föður stúlkunnar frá för þeirra mæðgnanna til [...] þegar þær voru á leið þangað og að á meðan stúlkan var þar hafi hún ítrekað verið í samskiptum við föður sinn,“ segir í dómi héraðsdóms.

Segir í dómnum að konan hafi haft löglegar leiðir til þess að leita réttar síns ef hún teldi að barnsfaðir sinni hefði brotið gegn hennar rétti.

„Með hliðsjón af því og málsatvikum öllum er því hafnað að líta sérstaklega við ákvörðun refsingar til ætlaðs samningsbrots föður stúlkunnar eða til þeirra takmörkuðu samskipta sem voru á milli stúlkunnar og föður hennar á þessu tímabili,“ segir í dómnum sem lesa má í heild sinni hér.