Formúlu-uppgjör: Allt á suðupunkti í Brasilíu

Í tíunda skiptið á árinu var það heimsmeistarinn Lewis Hamilton sem stóð uppi sem sigurvegari í Formúlu 1 kappakstri helgarinnar. Keppnin í Brasilíu var afar spennandi þar sem aðeins fimm sekúndur skildu að fyrstu fjóra ökumennina.

Með sigrinum tryggði Lewis Hamilton liði sínu, Mercedes, heimsmeistaratitil bílasmiða fimmta árið í röð. Aðeins einu sinni áður hefur það skeð að lið vinni fimm titla í röð, árangur sem að Ferrari náði er það vann sex sinnum í röð frá árunum 1999 til 2004.

Í öðru sæti á eftir Hamilton kom Max Verstappen á Red Bull. Verstappen keyrði listavel á sunnudaginn og leiddi kappaksturinn örugglega framan af, þrátt fyrir að ræsa aðeins fimmti.

Sigurinn tekinn af Verstappen

Á 44. hring kappakstursins var Max að hringa hægfara Force India bíl Esteban Occon sem endaði með ósköpum. Verstappen var kominn framúr í fyrstu beygju en í næstu beygju gaf Occon ekki tommu eftir og klessti inn í hlið Red Bull bílsins.

Esteban fékk fyrir vikið tíu sekúndna refsingu en refsing Verstappen var mun harðari því Hollendingurinn varð af öruggu fyrsta sæti.

„Ég er bara að keyra minn kappakstur og svo kemur svona fáviti og eyðileggur allt,“ hafði Max að seigja um Frakkann eftir keppni.

Verstappen lét þó ekki bara ljót orð í garð Esteban duga, því eftir keppnina lagði Hollendingurinn hendur á Occon.

Ökumenn eru alltaf vigtaðir eftir keppni í skúr FIA og þar hrinti Max Frakkanum og strunsaði svo út. Einhverjir áhorfendur sáu atvikið og klöppuðu Verstappen lof í lófa.

Christian Horner, stjóri Red Bull, stóð við bakið á sínum ökumanni eftir keppnina.

„Auðvitað styðjum við ekki ofbeldi en þegar hringaður bíll stelur af þér sigri ertu auðvitað mjög reiður.“

Þriðji varð Kimi Raikkonen á Ferrari í hans næstsíðasta kappakstri fyrir liðið. Ferrari hefði þurft að fá allavegana 12 stigum meira en Mercedes til að halda lífi í titilbaráttu bílasmiða þetta árið.

Því er baráttan um titlana tvo búin í ár þrátt fyrir að ein keppni er eftir. Lokakappaksturinn fer fram í Abu Dhabi eftir tvær vikur.