Friðrik í tveggja leikja bann

Friðrik Svavarsson, leikmaður Akureyrar í Olísdeild karla, var úrskurðaður í tveggja leikja bann af aga- og úrskurðarnefnd HSÍ.

Leikbroti Friðriks í leik Gróttu og Akureyrar þann 4. nóvember var vísað til aganefndarinnar af framkvæmdarstjóra HSÍ eftir því sem segir í úrskurðinum.

Akureyri skilaði nefndinni greinagerð vegna málsins en Friðrik var dæmdur í tveggja leikja bann „að teknu tilliti til stighækkandi áhrifa.“

Friðrik mun missa af leik Akureyrar og Stjörnunnar á laugardaginn og heimaleik gegn HF 25. nóvember.

Á fundi aganefndar var rautt spjald Svavars Kára Grétarssonar, leikmanns Fram, úr leik Fram og ÍR um síðustu helgi tekið til baka þar sem í agaskýrslu dómaranna hafi komið fram að „við endurmat á atvikinu hafi þessi ákvörðun verið röng.“

Spjaldið mun því ekki gilda ef kemur til ítrekunaráhrifa vegna rauðra spjalda.