Ágæt rjúpnaveiði fyrstu helgina

Fyrsta helgin á rjúpnaveiðitímabilinu er liðin og þær fréttir sem berast af veiðislóð eru nokkuð misjafnar eftir landshlutum.

Það var leiðindaveður víða fyrir norðan sem dró nokkuð úr aðsókn en að sama skapi var mikið af skyttum á ferð í öðrum landshlutum þar sem veðrið var betra.  Sem fyrr eru nokkur svæði mikið sótt og á Holtavörðuheiði, við og í kringum heiðarnar við Laugarvatn, Skjaldbreið, Uxahryggi, Bröttubrekku og Auðkúluheiði var mikið af mannskap.

Sögur af aflabrögðum eru misjafnar en það voru ansi margir með lítið eða ekkert en hjá þeim sem lentu í fugli var algengt að hver byssa hafi verið með 2-4 fugla eftir daginn á göngu.  Mesta veiðin sem við höfum heyrt af var skytta á norðurlandi sem var með 47 fugla eftir helgina og sagði sá ágæti maður að hann væri bara hættur því hann þyrfti ekki meira.  Þetta hljómar kannski eins og ríflegur afli en hann er með stórfjölskylduna í mat um jólin.  Börn, barnabörn, foreldra og tengdaforeldra eða samtals 26 manns svo það þurfti slatta af fugli til að metta þennan hóp.

Nú er önnur helgi að bresta á og spáir nokkuð vel alla dagana á vestur og suðurlandi eða frosti og sól.  Það er talsverðri snjókomu spáð fyrir norðan og austan og eru skyttur sem hyggjast halda til veiða þar sem spáin er tvísýn beðnir um að fara varlega og láta vita af ferðum sínum, vera vel búnir og ana ekki út í neina vitleysu.