Jón Daði dvaldi á spítala í vikunni: „Verkur sem ég vil aldrei upplifa aftur“

Jón Daði Böðvarsson var ekki í leikmannahópi Reading í dag en hann tilkynnti á Twitter-síðu sinni í dag að hann dvaldi á spítala í vikunni.

Jón Daði segist hafa vaknað á miðvikudagsmorgninum og fundið fyrir alvarlegum verkjum í kviðnum. Hann hafi strax farið á spítala.

Þar hafi hann verið í einn og hálfan dag en hann segir að þessir verkir séu eitthvað sem hann vilji aldrei upplifa aftur.

Hann þakkar starfsfólki spítalans og er hann aftur kominn til síns heima. Hann segist vera að komast á rétt ról og segir heilsuna vera númer eitt.

Jón Daði er að sjálfsögðu í íslenska landsliðshópnum sem mætir Belgíu og Sviss í Þjóðadeildinni en leikið er áttunda og ellefta september.

pic.twitter.com/AUbBkmA3bc

— Jon Dadi Bodvarsson (@jondadi) September 1, 2018