Boltinn fór inn og leikmennirnir fögnuðu en dómarinn dæmdi innkast

„Þetta er alveg ótrúlegt,“ sagði knattspyrnustjóri Partick Thistle eftir leik liðsins í skosku deildinni um helgina. Það er auðvelt að vera sammála honum.

Partick Thistle vann reyndar leikinn á móti Greenock Morton 1-0 en stærsta frétt leiksins var mark sem var dæmt af eða í rauninni aldrei dæmt gilt.

Skot Kris Doolan fór ekki aðeins inn í markið því það fór í marknetið áður en boltinn skaust út aftur. Leikmenn Partick Thistle fögnuðu skiljanlega markinu en dómarinn flautaði ekki mark.

Dómari leiksins hljóp þá til aðstoðardómara síns og ræddi málin. Á endanum gaf hann ekki mark heldur dæmdi innkast.

„Markið“ má sjá hér fyrir neðan á Twitter-síðu Partick Thistle.

Over the line? You decide. pic.twitter.com/tG24Xil8Md

— Partick Thistle FC (@PartickThistle) September 1, 2018

„Ég er bara ánægður að þetta hafði ekki áhrif á niðurstöðu leiksins,“ sagði Alan Archibald, knattspyrnustjóri Partick Thistle.

„Ég er á miðlínunni og sé boltann fara inn þaðan. Hann fer í slána, skoppar einn og hálfan jarda inn fyrir línuna, fer í netið og svo sparka þeir honum út. Svo ákveður allt í einu línumaðurinn að boltinn hafi ekki farið inn,“ sagði Archibald.

Þetta var annar heimasigur Partick Thistle í röð en liðið hefur fullt hús á heimavelli en tómt hús á útivelli eftir fjórar umferðir í skosku b-deildinni.