Jón Daði með bæði mörk Reading í jafntefli

Jón Daði Böðvarsson skoraði bæði mörk Reading er liðið gerði 2-2 jafntefli við Blackburn Rovers í ensku B-deildinni í kvöld.

Jón Daði kom Reading yfir á tólftu mínútu og þrettán mínútum síðar tvöfaldaði hann forystuna með sínu öðru marki.

Í síðari hálfleik snérist þó leikurinn. Charles Mulgrew minnkaði muninn úr vítaspyrnu á 51. mínútu og Mulgrew skoraði aftur úr vítaspyrnu á 76. mínútu. Lokatölur 2-2.

Byrjun Reading hefur verið skelfileg. Þetta var fyrsta stig liðsins í fyrstu fjórum leikjunum en Blackburn er með sex stig eftir leikina fjóra.

Byrjunin hefur þó ekki verið eins slæm fyrir Jón Daða. Hann hefur skorað öll þrjú mörk Reading í ensku B-deildinni.

Birkir Bjarnason var ónotaður varamaður er liðið gerði 2-2 jafntefli gegn Brentford á heimavelli. Villa er í fimmta sætinu með átta stig.

Ömurlegt gegni Stoke heldur áfram en liðið sem lék í deild þeirra bestu á síðustu leiktíð er einungis með tvö stig eftir fjóra leiki.

Liðið tapaði í kvöld sannfærandi, 3-0, fyrir Wigan en Will Grigg skoraði tvö af mörkum Wigan. Leeds, Middlesbrough og Wigan eru á toppnum með tíu stig.