Real hefur áhuga á Sterling

Real Madrid hefur endurvakið áhuga sinn á framherja Manchester City, Raheem Sterling. Sky Sports greinir frá þessu í dag.

Þrátt fyrir áhugann er ekki líklegt að Real bjóði í Sterling áður en glugginn á Spáni og víðast hvar um Evrópu lokar á föstudagskvöldið.

Áður hafði Real haft áhuga á Sterling en hann er í landsliðshópi Englands sem mætir Spáni á Wembley áttunda september í Þjóðadeildinni.

Sterling á tvö ár eftir af samningi sínum hjá City og hefur enn ekki skrifað undir lengri samning en City og hann komust ekki að samkomulagi er aðilarnir ræddu saman í júní.

Sterling fór hamförum á síðustu leiktíð. Hann skoraði 23 mörk í 46 leikjum City sem varð Englandsmeistari með hundrað stig.