Jesus með Man City næstu fimm árin

Brasilíski markahrókurinn Gabriel Jesus er búinn að framlengja samning sinn við Englandsmeistara Manchester City um fimm ár.

Jesus kom til Man City frá Palmeiras í heimalandinu í janúar 2017 og byrjaði strax að láta til sín taka þar sem hann skoraði sjö mörk í fyrstu tíu leikjum sínum í ensku úrvalsdeildinni.

Á sínu fyrsta heila tímabili með Man City skoraði Jesus sautján mörk í 42 leikjum í öllum keppnum.

Þessi 21 árs gamli sóknarmaður er í skýjunum með nýja samninginn.

„Besta ákvörðun sem ég hef tekið í lífinu var að koma til Man City. Síðan ég kom hingað hef ég bætt mig mikið; bæði sem atvinnumaður og sem persóna. Ég vil líka þakka stuðningsmönnum fyrir hve frábærlega þeir hafa tekið mér,“ sagði Jesus við undirskriftina.

Jesus verður í eldlínunni með Man City þegar liðið mætir Chelsea á Wembley á morgun í leiknum um Samfélagsskjöldin. Leikurinn hefst klukkan 14 og verður í beinni útsendingu á Stöð 2 Sport.