Tottenham steinlá á meðan Arsenal lagði Lazio

Enska úrvalsdeildin hefst næstkomandi föstudag og eru ensku liðin mörg hver að leika sína síðustu æfingaleiki um helgina.

Tottenham er eitt þeirra en liðið steinlá fyrir spænska úrvalsdeildarliðinu Girona í æfingaleik á Spáni í dag.

Brasilíumaðurinn Lucas Moura kom Tottenham yfir snemma leiks en spænska liðið tók í kjölfarið öll völd og vann að lokum öruggan 4-1 sigur. Tottenham lék án flestra lykilmanna sinna og mun líklega líka gera það í fyrstu umferð ensku úrvalsdeildarinnar þar sem þeir sækja Newcastle heim eftir slétta viku.

Á sama tíma unnu erkifjendur þeirra í Arsenal 2-0 sigur á Lazio en leikið var á Friends Arena í Stokkhólmi. 

Reiss Nelson skoraði fyrra mark Arsenal og Pierre-Emerick Aubameyang kom inn af bekknum í síðari hálfleik og gulltryggði sigur Arsenal.

Arsenal mætir Man City í stórleik fyrstu umferðar ensku úrvalsdeildarinnar á sunnudag.