Mahrez skrifar undir hjá City í vikunni

Riyad Mahrez, vængmaður Leicester, mun ganga í raðir Manchester City síðar í vikunni en þetta herma heimildir Sky Sports.

Þessi 27 ára gamli leikmaður Leicester er sagður á leið í læknisskoðun síðar í vikunni en félögin eru sögð hafa komist að samkomulagi um félagsskiptin.

Talið er að City borgi 60 milljónir punda fyrir kappann en Leicester vildi 80 milljónir fyrir hann í janúar er City gerði sig líklegt til þess að klófesta hann.

Hann bað um sölu frá Leicester og reyndi allt til þess að komast burt en allt kom fyrir ekki og kláraði hann tímabilið með Englandsmeisturunum frá því 2016.

Hann skoraði 13 mörk í 41 leik fyrir Leicester á síðustu leiktíð. Flestir leikmenn Leicester mættu aftur til vinnu í gær en Mahrez fékk örlítið lengra frí því hann spilaði vináttulandsleik með Alsír þan sjöunda júní.