Sky: United tilkynnir Fred fyrir helgi

Heimildir Sky Sports herma að Manchester United muni tilkynna brasilíska leikmannin Fred sem nýjan leikmann liðsins fyrir vikulok.

United tilkynnti það fyrr í mánuðinum að samkomulag hefði náðst á milli United og úkraínska félagsins Shakhtar Donetsk. Fjölmiðlar í Bretlandi segja Fred hafa staðist læknisskoðun hjá félaginu í byrjun júní þegar Brasilía lék vináttulandsleik við Króatíu á Anfield. 

Töfin á félagskiptunum er sögð vera vegna vinnuleyfis fyrir miðjumanninn í Englandi en það er svo gott sem komið í gegn samkvæmt heimildum ensku fréttastofunnar.

Talið er að kaupverðið sé yfir 50 milljónir punda. United hefur nú þegar keypt varnarmanninn unga Diogo Dalot fyrir 19 milljónir punda frá Porto.

Fred er um þessar mundir á HM í Rússlandi með brasilíska landsliðinu. Hann var ónotaður varamaður í 1-1 jafntefli Brasilíu og Sviss í þeirra fyrsta leik.