Segist geta lesið Kim eins og opna bók á innan við einni mínútu

Donald Trump Bandaríkjaforseti segir að hann muni vita innan einnar mínútu frá upphafi leiðtogafundarins með Kim Jong-un í næstu viku hvort fundurinn beri árangur.

Í samtali við fréttamenn á G7 ráðstefnunni í La Malbaie í Kanada sagðist Trump vera nægilega góður mannþekkjari til að fá strax tilfinningu fyrir þeim sem hann hitti. Það sé stundum sagt að fyrstu fimm sekúndurnar skipti öllu máli og þá strax muni verða ljóst hvort Kim sé alvara með tali um kjarnorkuafvopnun.

Trump sagðist vissulega vera með skýr markmið í huga en hann hefði ekki ákveðið hvernig væri best að ná þeim markmiðum. Líklega muni hann bara fylgja eigin tilfinningu á fundinum og spinna eitthvað jafn óðum. Fundurinn sé hvort eð er án fordæmis.