Ólafía gat ekkert spilað í gær vegna veðurs

Ekkert varð af því að Ólafía Þórunn Kristinsdóttir fékk að spila á fyrsta keppnisdegi Sjálfboðaliðamóts Ameríku [Volunteers of America LPGA Texas Classic] sem hófst í Texas í gær.

Miklir vindar voru á vellnum í gær sem gerði kylfingum erfitt fyrir og var leik hætt snemma morguns, aðeins rúmri klukkustund eftir að byrjað var að spila. Byrjað verður upp á nýtt í dag og árangur þeirra kylfinga sem voru úti á vellinum þegar leik var hætt verður þurrkaður út.

Haldið var í vonina um að hægt yrði að spila í gær en síðdegis, um klukkan hálf fjögur að staðartíma, var ákvörðun loks tekin um að aflýsa fyrstu umferðinni.

Ólafía Þórunn mun hefja leik klukkan 17.11 í dag en sýnt verður beint frá mótinu á Golfstöðinni.