Innlent

Harpa kveður þjónustufulltrúa sína og óskar þeim góðs gengis

Jakob Bjarnar skrifar
Samkvæmt yfirlýsingu sem Svanhildur Konráðsdóttir, forstjóri Hörpu, sendi fjölmiðlum er rangt sem fram hefur komið að hún hafi þegið launahækkun um 20 prósent og ekki stendur til að koma til móts við þjónustufulltrúa þá sem sagt hafa upp störfum.
Samkvæmt yfirlýsingu sem Svanhildur Konráðsdóttir, forstjóri Hörpu, sendi fjölmiðlum er rangt sem fram hefur komið að hún hafi þegið launahækkun um 20 prósent og ekki stendur til að koma til móts við þjónustufulltrúa þá sem sagt hafa upp störfum.
Svanhildur Konráðsdóttir, forstjóri Hörpu, hefur fyrir hönd tónlistarhússins sent frá sér yfirlýsingu. En, hún, ásamt stjórn Hörpu og starfsmönnum, hafa fundað vegna uppsagna 17 þjónustufulltrúa. Á yfirlýsingunni er helst að skilja að ekki verði komið til móts við þá þjónustufulltrúa sem sagt hafa upp störfum vegna kjaraskerðingar, en þeir hafa vísað til þess að óásættanlegt sé að taka á sig launalækkun vegna launahækkunar forstjórans.

Því hafnað að laun Svahildar hafi hækkað eins og komið hefur fram í fjölmiðlum

Í stjórn Hörpu sitja: Þórður Sverrisson stjórnarformaður, Arna Schram meðstjórnandi, Árni Geir Pálsson meðstjórnandi, Aðalheiður Magnúsdóttir meðstjórnandi og Vilhjálmur Egilsson meðstjórnandi. Samkvæmt yfirlýsingunni hefur stjórnin tekið sér stöðu með Svanhildi í deilum við þjónustufulltrúana ósáttu.

Arna Schram,sviðsstjóri menningar- og ferðamálasviðs Reykjavíkurborgar, á sæti í stjórn Hörpu.mynd/reykjavíkurborg
„Á fundinum var einnig farið yfir staðreyndir er varða laun forstjóra Hörpu líkt og yfirlýsing stjórnar hefur rakið, þar sem fram kemur að þvert á fréttaflutning í síðustu viku voru laun forstjóra ekki hækkuð um 20% eftir 2 mánuði í starfi heldur tók hann á sig tímabundna launalækkun til 1. júlí. Ástæður þessa eru að fyrsti úrskurður kjararáðs um laun forstjóra Hörpu barst eftir að gengið hafði verið frá ráðningu og gilti sá úrskurður þar til að breytt ákvæði laga um kjararáð tóku gildi. Laun forstjóra Hörpu lækkuðu því á síðasta ári frá þeim forsendum sem lágu til grundvallar ráðningunni,“ segir í yfirlýsingunni.

Þjónustufulltrúarnir kvaddir

Þar er sagt að Harpa sé gefandi og góður vinnustaður sem telur sig greiða samkeppnishæf laun.

„Það er mjög leitt að sjá á eftir góðu fólki sem starfað hefur í Hörpu sem þjónustufulltrúar til lengri eða skemmri tíma en telur sig ekki eiga samleið með fyrirtækinu áfram, en 17 uppsagnir hafa borist. Uppsagnarfrestur er þrír mánuðir og munu aðilar fara í framhaldinu yfir næstu skref. Framkvæmdastjórn Hörpu virðir að sjálfsögðu þessa ákvörðun þeirra þjónustufulltrúa sem sagt hafa upp störfum og óskar þeim velfarnaðar.

Ellen Kristjánsdóttir hefur sagst ekki munu stíga fæti á svið í Hörpu fyrr en laun þjónustufulltrúa hafa verið leiðrétt. Miðað við yfirlýsingu Hörpu er ekki útlit fyrir frekari tónleika hjá Ellen í húsinu á næstunni.Vísir/Hari
Vísir ræddi við einn þjónustufulltrúanna í morgun og þá var niðurstöðu fundarins beðið með nokkurri eftirvæntingu. Nú liggur fyrir að ekki verður komið til móts við þá en viðmælandi Vísis vissi ekki hvort þeir sem sagt hafa upp yrði vikið frá störfum umsvifalaust eða hvort þeir þyrftu að vinna uppsagnafrestinn. Samkvæmt yfirlýsingunni verður sá háttur hafður á. Fyrir liggur að þjónustufulltrúarnir njóta verulegs stuðnings og þannig hefur hin þekkta og vinsæla tónlistarkonar Ellen Kristjánsdóttir lýst því yfir að hún ætli að sniðganga Hörpu meðan þessi staða er uppi.

Yfirlýsingin í heild sinni er svohljóðandi:

Yfirlýsing frá Hörpu

Vegna yfirlýsingar frá þjónustufulltrúum Hörpu sem sögðu upp störfum í gær

Þjónustufulltrúum Hörpu var boðið til fundar með forstjóra og fjármálastjóra, yfirmanni tæknisviðs og  skipuleggjanda vakta þeirra í dagslok í gær og var tilefni fundarins umfjöllun fjölmiðla um óánægju þeirra vegna launamála. Fundurinn var yfirvegaður og hreinskiptinn. Farið var yfir allar staðreyndir varðandi laun forstjóra, ýmis mál er snerta störf þjónustufulltrúa rædd og hlustað á sjónarmið allra sem kusu að tjá sig.

Rekstur Hörpu hefur verið þungur um árabil og á síðasta ári gerðu eigendur og stjórn skýra kröfu um að ráðist yrði í aðgerðir til að bæta reksturinn og draga úr tapi. Síðastliðið sumar hófst endurskoðun á öllum rekstrarþáttum Hörpu og mun sú vinna standa yfir næstu misserin. Aðgerðir til að bæta rekstur birtast með ýmsum hætti á mismunandi starfssviðum Hörpu. 117 einstaklingar eru á launaskrá hjá Hörpu. Allir starfsmenn félagsins, þjónustufulltrúar sem aðrir, hafa lagt sitt lóð á vogarskálarnar með breytingum á vinnufyrirkomulagi og kjörum en einnig með auknu vinnuframlagi þar sem ekki er ráðið í laus störf og mönnun á mörgum sviðum minnkuð þar sem sem því hefur verið við komið.

17 þjónustufulltrúar hafa sagt upp störfum.vísir/egill
Hvað þjónustufulltrúa varðar þá var eldri samningum sagt upp sl. haust með fjögurra mánaða fyrirvara. Var haft fullt samráð við stéttarfélag og trúnaðarmann starfsmanna í þessum ferli. Þjónustufulltrúum bauðst nýr samningur sem tók gildi um sl. áramót sem felur í sér 15% yfirborgun frá kjarasamningi og var þetta ein af fjölmörgum aðgerðum við að draga úr kostnaði við viðburðahald. Störf þjónustufulltrúa eru unnin í tímavinnu og tengjast nánast einvörðungu viðburðahaldi í húsinu. Langflestir sinna þessu sem hlutastarfi með námi og einkennist ráðningarsambandið af miklum sveigjanleika hvað varðar tíma og vinnu sem innt er af hendi. Þvert á það sem kemur fram í yfirlýsingu þjónustufulltrúa var því aldrei haldið fram við þá eða aðra starfsmenn Hörpu að sömu aðgerðum yrði beitt á öllum sviðum, enda eru allir kostnaðarþættir í rekstri fyrirtækisins til skoðunar.

Þær fjölmörgu aðgerðir sem ýmist hafa verið settar af stað eða eru í vinnslu og er ætlað að stuðla að hagræðingu í rekstri Hörpu, tengjast langt í frá aðeins hagræðingu í launakostnaði heldur einnig kostnaði við rekstur fasteignar, aukinni tekjuöflun og fleiru. Þessar aðgerðir voru þegar farnar að skila árangri á síðasta ári þegar rekstur Hörpu batnaði á milli ára í fyrsta sinn; þær eru enn í fullum gangi og í því efni er allt til endurskoðunar líkt og kom ítrekað fram á fundinum og eru það laun stjórnenda ekki undanskilin.

Á fundinum var einnig farið yfir staðreyndir er varða laun forstjóra Hörpu líkt og yfirlýsing stjórnar hefur rakið, þar sem fram kemur að þvert á fréttaflutning í síðustu viku voru laun forstjóra ekki hækkuð um 20% eftir 2 mánuði í starfi heldur tók hann á sig tímabundna launalækkun til 1. júlí. Ástæður þessa eru að fyrsti úrskurður kjararáðs um laun forstjóra Hörpu barst eftir að gengið hafði verið frá ráðningu og gilti sá úrskurður þar til að breytt ákvæði laga um kjararáð tóku gildi. Laun forstjóra Hörpu lækkuðu því á síðasta ári frá þeim forsendum sem lágu til grundvallar ráðningunni.

Harpa er gefandi og góður vinnustaður og telur sig greiða samkeppnishæf laun. Það er mjög leitt að sjá á eftir góðu fólki sem starfað hefur í Hörpu sem þjónustufulltrúar til lengri eða skemmri tíma en telur sig ekki eiga samleið með fyrirtækinu áfram, en 17 uppsagnir hafa borist. Uppsagnarfrestur er þrír mánuðir og munu aðilar fara í framhaldinu yfir næstu skref. Framkvæmdastjórn Hörpu virðir að sjálfsögðu þessa ákvörðun þeirra þjónustufulltrúa sem sagt hafa upp störfum og óskar þeim velfarnaðar.“


Tengdar fréttir

Ellen ætlar að sniðganga Hörpu

Söngkonan Ellen Kristjánsdóttir er ein fjölmargra sem lýsa yfir stuðningi við þjónustufulltrúana í Hörpu, sem sögðu upp störfum í gær eftir fund með forstjóranum Svandhildi Konráðsdóttur

Starfsmönnum Hörpu var gert að samþykkja launalækkun

Reiði er meðal starfsmanna Hörpu vegna launahækkunar forstjóra í fyrra. Þjónustufulltrúar þurftu að taka á sig verulega launalækkun í lok síðasta árs vegna slæmrar stöðu félagsins. Leituðu til lögfræðinga VR vegna þessa. Þjónustufulltrúinn Örvar Blær Guðmundsson sagði upp í gær eftir að hafa lesið frétt Fréttablaðsins.




Fleiri fréttir

Sjá meira


×