Messan: Enginn í Liverpool borg vill halda Allardyce

Sam Allardyce er ekki vinsælasti maður Liverpool borgar og stuðningsmönnum Everton líkar ekkert sérstaklega vel við stjórann sinn. Hjörvar Hafliðason sagðist ekki eiga von á að Allardyce nái öðru tímabili með félaginu.

Allardyce tók við liði Everton í nóvember af Ronald Koeman og náði að hífa það úr fallbaráttunni og upp í áttunda sæti deildarinnar.

Strákarnir í Messunni tóku Allardyce fyrir í gær og ræddu möguleika hans í starfi.

„Mér finnst hann hafa gert príðilega hluti með Everton-liðið. Hann var ekki vinsælasti maðurinn í Liverpool borg þegar hann kom en hann hefur náð í punkta,“ sagði Ólafur Kristjánsson, einn sérfræðinga Messunnar og þjálfari FH í Pepsi deild karla.

„Ég myndi segja að Everton sé einu sæti frá því að vera á réttum stað miðað við fjármuni. Þú ert með topp sex þar sem Everton á ekkert heima í, sjöunda sæti væri eðlilegt fyrir Everton,“ sagði sérfræðingurinn Hjörvar Hafliðason.

Allardyce skrifaði undir tveggja ára samning við Everton en umræðan í fótboltaheiminum er að hann hætti hjá félaginu eftir þetta tímabil.

„Ef þú horfir á árangurinn og hvaða úrslitum hann nær þá þætti manni skrítið að láta hann fara. En bara eins og stemmingin er þarna í borginni, það vill enginn halda honum,“ sagði Hjörvar.

„Hann er óhemju óvinsæll í Liverpool borg og hann á ekki „break.“ Knattspyrnuáhugamenn í Liverpool eru öðruvísi en annars staðar í Englandi, þeir lifa gjörsamlega fyrir þetta og Everton stuðningsmenn munu ekki sætta sig við annað tímabil af Sam Allardyce.“