Donkey Kong-kóngur sviptur meti vegna svindls

Tölvuleikjaspilarinn Billy Mitchell hefur verið sviptur öllum metum sínum eftir að upp komst að hann hafði svindlað til að ná þeim.

Greint er frá þessu á vef Variety en Mitchell skaust upp á stjörnuhiminn eftir að fjallað var um feril hans sem tölvuleikjaspilari í heimildarmyndinni The King of Kong: A Fistful of Quarters.

Bandarísku samtökin Twin Galaxies, sem halda skráningu yfir hæsta stigafjöldann í hverjum leik, tilkynntu þetta fyrr í dag.

„Með þessum úrskurði, geta Twin Galaxies ekki viðurkennt Billy Mitchell sem þann fyrsta til að ná milljón stigum í Donkey Kong,“ segir í tilkynningu frá samtökunum.

Samtökin hafa því viðurkennt tölvuleikjaspilarann Steve Wiebe sem þann sem náði fyrstur milljón stigum í Donkey Kong.

Heimildarmyndin The King of Kong: A Fistful of Quarters en hún sagði frá tilraunum Steve Wiebe til að ná heimsmetinu í tölvuleiknum Donkey Kong af Billy Mitchell. Wiebe náði að slá metið og komast yfir milljón stig. Hann sendi upptöku af mettilrauninni til Twin Galaxies sem staðfestu metið og varð Wiebe samstundis nokkuð frægur á Seattle-svæðinu í Bandaríkjunum.

Mitchell kallaði eftir því að spilakassinn sem Wiebe notaðist við yrði rannsakaður af Twin Galaxies. Mithcell benti á að í spilakassanum sem Wiebe notaði væri hringrásartæki sem keppinautur Mitchells hefði hannað. Twin Galaxies ákvað því að draga viðurkenninguna á meti Wiebes til baka.

Wiebe brá þá á það ráð að slá metið fyrir framan stóran hóp áhorfenda á annað tæki þar sem hann náði 985 þúsund stigum.

Gerði það Wiebe að ákveðinni Donkey Kong-goðsögn en Mitchell var hvergi nærri hættur því hann sendi Twin Galaxies upptöku af sér á myndbandsspólu að ná rúmlega einni milljón stiga í Donkey Kong og fékk viðurkenningu á því frá Twin Galaxies, þrátt fyrir mótmæli Wiebe.

Twin Galaxies viðurkenndu síðar meir að samtökin hefðu verið ósanngjörn í framkomu gagnvart Wiebe og leyfðu honum að senda inn upptökur af mettilraunum hans í Donkey Kong. Hann náði síðar meir 1.049.100 stigum og fór þar með fram úr Mitchell.

Twin Galaxies viðurkenna því Wiebe sem þann fyrsta til að ná yfir einni milljón stiga í Donkey Kong.