Haukar og ÍBV drógust saman í bikarnum

Í dag kom í ljós hvaða lið mætast á bikarúrslitahelgi handboltans en þá var dregið í undanúrslit Coca Cola bikars karla og kvenna.

Haukar og ÍBV lentu saman hjá körlunum en þessi tvö lið hafa spilað marga magnaða handboltaleiki á síðustu árum.

Selfyssingar fá aftur á móti leik á móti Fram. Fram kom mjög á óvat með sigri á toppliði FH í átta liða úrslitunum en Selfoss rétt marði þá b-deildarlið Þróttar.

Það er líka risaleikur hjá konunum en þar mætast ÍBV og Fram. Í hinum leiknum spilar síðan b-deildarlið KA/Þór við Hauka.

Það verða nýir bikarmeistarar krýndir í ár því Valur datt út á móti Haukum hjá körlunum og Stjörnukonur duttu út á móti ÍBV. Karlalið Vals og kvennalið Stjörnunnar höfðu bæði unnið bikarinn tvö ár í röð.

Undanúrslitaleikirnir fara fram 8. mars hjá konunum og 9. mars hjá körlunum. Bikarúrslitaleikirnir eru síðan laugardaginn 10. mars. Allir leikirnir fara fram í Laugardalshöllinni.

Í undanúrslitum Coca Cola bikars karla 9. mars mætast:

17.15 Haukar - ÍBV

19.30 Selfoss - Fram

Í undanúrslitum Coca Cola bikars kvenna 8. mars mætast:

17.15  ÍBV - Fram

19.30  Haukar - KA/Þór

Hér fyrir neðan má sjá útsendingu Handknattleikssambands Íslands frá drættinum.