Kaupa lyfjaverksmiðju Actavis á Íslandi

Kaup Coripharma og hóps fjárfesta á lyfjaverksmiðju og skrifstofuhúsnæði Actavis í Hafnarfirði voru undirrituð í gær. Kaupverð samningsins, sem undirritað var með „hefðbundnum fyrirvörum,“ er trúnaðarmál.

Seljandinn var ísraelski samheitalyfjarisinn Teva Pharmaceutical Industries en hann festi kaup á Actavis um mitt ár 2015. Kaupverðið þá var um 40,5 milljarðar dala, sem svaraði til 5400 milljarða íslenskra króna á þeim tíma.

Ísraelska fyrirtækið lagði niður starfsemi lyfjaframleiðslu fyrirtækisins hér á landi í fyrra en áform þess efnis voru kynntar í júní árið 2015. Til stóð að um 300 störf myndu flytjast úr landi vegna þessa. 

Sjá einnig: Starfsfólk Actavis ósátt og íhugar uppsagnir

Leiddi það meðal annars til hópuppsagna hjá Actavis í upphafi síðasta árs, þegar um 185 starfsmenn misstu vinnuna á rúmlega tveggja mánaða tímabili. Rekstur móðurfélagsins hafði verið þungur en það skuldaði um 30 milljarða dala í lok síðasta árs.

Hópur stjórnenda og lykilstarfsmanna Actavis eru sögð í Morgunblaðinu í dag hafa unnið að því undanfarin tvö ár að fá fjárfesta með sér í verkefnið, svo að hægt væri að gera kaupin möguleg og endurvekja rekstur verksmiðjunnar.

Í blaðinu kemur jafnframt fram að rafmagnsverkfræðingurinn Bjarni K. Þorvarðarson verði forstjóri Coripharma, sem festi kaup á Actavis sem fyrr segir.

Fyrirtækið er þegar sagt hafa ráðið tíu manns til vinnu og er vonast til þess að starfsmennirnir verði orðnir 40 talsins innan þriggja mánaða. Þá sé stefnt að því að innan tveggja ára verði fjöldi þeirra orðinn 300.

Uppfært klukkan 7:45

Í fréttatilkynningu frá Coripharma er haft eftir Bjarna að aðstandendur kaupanna séu mjög ánægðir að hafa náð samkomulagi við Teva.

„Í hópi Coripharma eru bæði reyndir fjárfestar og vanir aðilar úr rekstri alþjóðlegra lyfjafyrirtækja og þessarar lyfjaverksmiðju. Samhliða sjálfstæðri lyfjaframleiðslu Coripharma sjáum við jafnframt fram á að njóta góðs af nánu sambýli við önnur lyfjafélög sem eru rekin hér í Hafnarfirðinum. Þannig stefnum við á kraftmikið og frjótt framleiðslu- og þekkingarsamfélag nokkurra félaga í skyldum rekstri í framtíðinni“, er haft eftir Bjarna.

Þá segir Torfi Rafn Halldórsson, framkvæmdastjóri viðskiptaþróunar hjá Coripharma, í sömu tilkynningu að félagið stefni á að verksmiðjan verði komin í fullan rekstur á ný innan árs.

 Vinna við að manna starfsemina og endurnýja öll gæðavottorð verksmiðjunnar sé þegar hafin og stefnt sé á að öll tilskilin leyfi til alþjóðlegrar lyfjaframleiðslu verði komin fyrir lok ársins.

Teva rekur áfram umfangsmikla starfsemi í Hafnarfirði þar sem um 280 manns starfa, meðal ananrs á sölu- og markaðssviði Actavis á Íslandi, í lyfjaþróun og hjá Medis sem selur lyf og lyfjahugvit félagsins til annarra lyfjafyrirtækja.