Neytendur

Meirihluti landsmanna andvígur áfengisauglýsingum

Kristín Ólafsdóttir skrifar
Farið verður yfir tillögu um afnám banns við áfengisauglýsingum í fjölmiðlum á næstunni.
Farið verður yfir tillögu um afnám banns við áfengisauglýsingum í fjölmiðlum á næstunni. Vísir/ERNIR
Meirihluti landsmanna segist andvígur því að leyfa birtingar áfengis- og tóbaksauglýsinga samkvæmt könnun MMR sem framkvæmd var í janúar. Rúmlega 60% svarenda sögðust andvíg því að áfengisauglýsingar væru heimilaðar. Þá sögðust karlmenn almennt hlynntari birtingu slíkra auglýsinga en konur, auk þess sem andstaða gegn þeim jókst með aldri.

Sjá einnig: Fjölmiðlar greitt háar sektir vegna auglýsinga

Rúmlega 60% svarenda sögðust andvíg því að áfengisauglýsingar væru heimilaðar en þar af sögðust tæp 42% vera mjög andvíg því. Stuðningur við heimilun áfengisauglýsinga var 18%.

Samtals tóku 98,8 prósent svarenda afstöðu til spurningarinnar.Mynd/MMR
Stuðningur við heimilun áfengisauglýsinga reyndist meiri með lækkandi aldri. Af yngsta aldurshópnum (18-29 ára) sögðust 26% vera fylgjandi heimilun auglýsinganna samanborið við 10% í elsta aldurshópnum (68 ára og eldri). Þó lýsti meirihluti (51%) svarenda á aldrinum 18-29 ára yfir andstöðu gegn heimilun auglýsinga en sú skoðun var þó töluvert meira afgerandi hjá elsta aldurshópnum, eða 79%.

Viðreisnarfólk sýnir mestan stuðning

Andstaða reyndist nokkuð minni hjá körlum (52%) heldur en konum (69%) og lýstu karlar auk þess frekar stuðningi við heimilun auglýsinganna heldur en konur (9%). Lítill munur reyndist á afstöðu eftir búsetu svarenda og tekjum svarenda en andstaða jókst samfara auknu menntunarstigi þeirra.

Afstaða svarenda virðist tvískipt sé horft til stjórnmálaskoðana. Stuðningsfólk Framsóknarflokks, Samfylkingar og Pírata sýndi umtalsverða andstöðu gegn heimilun áfengisauglýsinga.

Mestur var stuðningur við heimilun auglýsinganna hjá stuðningsfólki Viðreisnar og Bjartrar framtíðar.

Könnunin var framkvæmd dagana 25. janúar til 30. janúar 2018 og var heildarfjöldi svarenda 928 einstaklingar, 18 ára og eldri. Könnunina má sjá í heild hér.

Munur eftir lýðfræðihópum.Mynd/MMR
Áfengi og tóbak Neytendur

Tengdar fréttir

Fjölmiðlar greitt háar sektir vegna auglýsinga

Framkvæmdastjóri Félags atvinnurekenda segir bann við áfengisauglýsingum fela í sér fráleita mismunun gagnvart framleiðendum og fjölmiðlum. Fjölmiðlar hafa undanfarið þurft að greiða 5,3 milljónir í sektir vegna áfengisauglýsinga.

Góð rök þarf til að breyta bitlitlu banni

Áfengisframleiðendur og innflytjendur koma auglýsingum óhindrað til almennings með keyptri dreifingu á samfélagsmiðlum. Nefnd vill afnema bann við áfengisauglýsingum. Ráðherra segir að lýðheilsusjónarmið muni ráða för.

Fagráð á móti afnámi auglýsingabanns

Verkefnisstjóri áfengis- og vímuvarna hjá Landlækni segir klárt að auglýsingum og markaðssetningu á áfengi fylgi aukin neysla. Misráðið væri að slaka á áfengislöggjöf hér á sama tíma og verið sé að herða hana í mörgum löndum.



Mest lesið


Fleiri fréttir

Sjá meira


×

Mest lesið