Rooney á leið í MLS-deildina

Wayne Rooney og DC United hafa komist að munnlegu samkomulagi um að leikmaðurinn spili fyrir liðið í bandarísku MLS-deildinni á næsta tímabili.

Samkvæmt heimildum Sky News hafa samningaviðræður staðið yfir milli Rooney og DC United síðustu sjö vikur og þó svo að Rooney hafi ekki skrifað undir enn sé hann búinn að gera upp hug sinn.

Talið er að kaupin muni kosta DC United 12 milljónir punda og gera Rooney að launahæsta leikmanni liðsins, en liðið er nú með einn lægsta launakostnað allra liða MLS-deildarinnar.

Líklegt þykir að kaupin verði tilkynnt 10. júlí þegar félagsskiptagluggi deildarinnar opnar.