Aðeins eru um helmingslíkur á því að þýskir bílaframleiðendur haldi leiðandi stöðu á bílamarkaði nema þeir aðlagi rekstur sinn að nýjum reglum og breyti framleiðsluháttum. Þetta fullyrðir forstjóri Volkswagen sem telur bílaiðnaðinn í Evrópu geta endað á sama hátt og gerðist vestan hafs.
Evrópsk stjórnvöld hafa lagt strangari reglur um útblástur bíla til að draga úr losun gróðurhúsalofttegunda sem valda loftslagsbreytingum á jörðinni og minnka loftmengun. Sumar borgir og lönd hafa jafnframt lýst því yfir að nýir dísil- og bensínbílar verði bannaðir eftir 2030, þar á meðal Ísland.
Bílaframleiðendur hafa kvartað sáran og sagt reglurnar munu skaða bílaiðnaðinn í álfunni og fækka störfum.
„Frá sjónarhóli dagsins í dag er líkurnar kannski 50-50 að þýski bílaiðnaðurinn verði enn á meðal þess besta í heiminum eftir tíu ár,“ segir Herbert Diess, forstjóri Volkswagen.
Hann telur að þýskar borgir sem reiða sig á bílaiðnaðinn og hafa blómstrað gætu farið sömu leið og bandarískar borgir eins og Detroit þar sem hart hefur verið í ári eftir að framleiðslan fluttist annað. Áætlar Diess að störfum hjá fyrirtækinu muni fækka um 14.000 fyrir 2020 þegar það eykur hlut rafbíla í framleiðslu sinni.
Ástæðan fyrir fækkun starfanna í bílaiðnaði er sú að skemmri tíma tekur að framleiða rafbíla en bíla með sprengihreyfli auk þess sem framleiðsla rafhlaðnanna fer fram annars staðar, að því er segir í frétt Reuters.
„Okkur er öllum ljóst að kerfisbreytingin mun leiða til færri starfa í bílaiðnaði í Þýskalandi. Spurningin er hversu langan tíma við þurfum til að innleiða þessa kerfisbreytingu?“ segir Diess.
Volkswagen er einn þeirra bílaframleiðenda sem urðu uppvísir að því að svindla á útblástursprófunum. Bílar sem fyrirtækið framleiddi menguðu þannig meira þegar þeir voru komnir út á götuna en í prófununum.
Örlög þýska bílaiðnaðarins gætu orðið þau sömu og þess bandaríska

Tengdar fréttir

Stefnt á að banna bensín- og dísilbíla eftir 2030 í loftslagsáætlun ríkisstjórnarinnar
Lögð er áhersla á orkuskipti í samgöngum og átak í kolefnisbindingu í aðgerðaáætlun ríkisstjórnarinnar í loftslagsmálum sem var kynnt í dag.

Brýnt að halda hlýnun Jarðar undir 1,5 gráðum
Vísindanefnd Sameinuðu þjóðanna um loftslagsmál hefur kynnt skýrslu um 1,5 gráðu markmiðið og útlistar hvað þjóðir heims þurfa að gera til að ná því.

Fjárfestar krefja Volkswagen um milljarða vegna útblásturshneykslis
Stjórnendur þýska bílaframleiðandans eru sakaðir um að hafa brugðist í að greina hluthöfum frá fjárhagslegum afleiðingum útblástursprófanasvindlsins.