Gerrard heldur áfram að ná í Liverpool menn til Rangers

Liverpool goðsögnin Steven Gerrard er byrjaður að safna liði hjá Rangers en hann tók nýverið við stjórnartaumunum hjá skoska stórveldinu. Þetta er fyrsta aðalþjálfarastarf Gerrard og er honum ætlað að koma Rangers aftur í allra fremstu röð í Skotlandi eftir mögur ár.

Hægri bakvörðurinn Jon Flanagan hefur komist að samkomulagi við Rangers um að ganga til liðs við félagið en hann er fyrrum liðsfélagi Gerrard hjá Liverpool.

Samningur Flanagan við Liverpool kláraðist á dögunum en hann var á láni hjá Bolton í ensku B-deildinni á síðustu leiktíð.

Áður hafði Gerrard fengið ungstirnið Ovie Ejaria lánaðan frá Liverpool auk þess sem aðstoðarmaður Gerrard hjá Rangers verður fyrrum liðsfélagi hans hjá Liverpool, Gary McAllister.