„Áttum skilið að skora mark“

Conor Coady, fyrirliði Wolves, sagði liðið hafa átt skilið að skora mark gegn Manchester City í dag. Willy Boly skoraði mark sem átti ekki að standa í 1-1 jafntefli liðanna.

Boly skoraði eftir hornspyrnu snemma í seinni hálfleik. Markið átti líklega ekki að standa því boltinn virtist fara af hendi Boly og í markið.

„Ég sá það ekki, en við áttum skilið að skora mark,“ sagði Coady við Sky Sports eftir leikinn.

„Manchester City er frábært lið en við héldum okkur við okkar skipulag og áttum nokkur færi. Þeir unnu úrvalsdeildina síðasta vor og eru risa stór klúbbur.“

Aymeric Laporte jafnaði fyrir City í seinni hálfleik og Sergio Aguero átti tvö skot í markrammann.

Wolves stillti upp sama liði og tapaði fyrir Leicester í síðustu umferð.

„Við byggðum ofan á leik okkar frá því í síðustu viku. Við spiluðum vel á móti Leicester og það var svekkjandi að ná ekki í sigur þar. Það var mjög gott að ná í stig í dag,“ sagði Conor Coady.