Mugabe lætur sjá sig á götum höfuðborgarinnar

Robert Mugabe, forseti Simbabve, sást opinberlega í fyrsta skipti síðan á miðvikudag þegar herinn í landinu reyndi að taka völdin. BBC greinir frá.

Tilefnið var útskriftarathöfn í höfuðborg landsins, Harare. Forsetinn er búinn að sitja heima í stofufangelsi síðustu daga eftir valdarán hersins í Simbabve. Samkvæmt heimildum var endurkomu hins 93 ára forseta fagnað af íbúum höfuðborgarinnar.

Forsetinn mætir árlega í útskriftarathafnir af þessu tagi en fáir bjuggust við því að sjá Mugabe viðstaddan eftir atburði síðustu daga.

Mikil spenna hefur verið í landinu, eins og greint hefur verið frá, eftir að Mugabe ákvað að reka varaforseta landsins Emmerson Mnangagwa úr embætti. Þeir höfðu verið bandamenn innan valdaflokksins ZANU-PF til fjölmargra ára.

Mugabe er talinn vera að greiða leið fyrir eiginkonu sína, hina 53 ára Grace Mugabe, í embætti forseta landsins.

Hann hefur stýrt Simbabve frá árinu 1980, fyrst sem forsætisráðherra og síðar sem forseti.