John Snorri nálgast toppinn óðfluga

Fjallagarpurinn John Snorri Sigurjónsson var staddur í hinum svokallaða „Bottleneck“ eða „Flöskuhálsi“ um klukkan þrjú í nótt að íslenskum tíma á leið sinni á topp fjallsins K2. Á Facebook-síðu göngunnar segir ef vel gengur nái John Snorri á toppinn nú um sjöleytið.

Gangan hefur verið erfið en John Snorri var brattur í samtali við Bítið á Bylgjunni í gær. Hann var staddur í fjórðu og síðustu búðum á leiðinni og lagði af stað á toppinn um klukkan 17 að íslenskum tíma.

Í Facebook-færslu Lífsspors, sem birt var um klukkan hálf fjögur í nótt, var einnig greint frá nákvæmri staðsetningu Johns Snorra. Hægt er að fylgjast með staðsetningunni hér á síðustu metrunum.

Uppfært klukkan 8:36:

John Snorri er kominn í 8516 metra hæð en síðasta staðsetning hans var send út klukkan 8:13 að íslenskum tíma. K2 er 8611 metrar að hæð svo John Snorri á aðeins tæpa 100 metra eftir upp á topp.